بدخشان ولایتی کینگش باشلیغی عبدالله ناجی نظری، ولایت بهارک تومنینینگ ایریم منطقهلری طالبلر قولیگه توشگنلیگیدن خبر بیرهدی. جناب نظرینینگ ایتیشیچه، بهارک تومنینینگ مرکزی و پولیس باشقرمهسی امنیتی کوچلر قولیده قالگن و حاضرچه منطقهده طالبلر بیلن امنیتی کوچلر ارا اوروش توختهتیلگن.
امنیتی مسؤوللرگه کوره، طالبلر فرصتدن استفاده قیلیب حکومت کنترولیگه بولگن منطقهلرده هجوم ایلتماقدهلر.
بهارک تومنی باشلیغی حاجی عتیق هم سلاموطندار بیلن تیلفونی صحبت قیلیب خبرنی تأیید قیلگن.
قندوزنینگ طالبلر بارلیگیدن پاکلنیشی
قندوز امنیتی مسؤوللری ولایتده اوروش یکونلهگنلیگیدن خبر بیرهدیلر و اوشبو شهردن بوتونلی طالبلر چیقاریلگنلیگینی بیلدیرهدیلر.
قندوز پولیس باشلیغی قسیم جنگلباغ نینگ جمعه کونگی ترقتگن خبرنامهسیده، اوچ کوندن بویان امنیتی کوچلرنینگ پاکلش عملیاتی نتیجهسیده شهرنی طالبلر بارلیگیدن پاک بولگنلیگینی بیلدیرهدی.
جناب جنگلباغ حربی کوچلر تلفاتیدن بیرنرسه دیمهدی، اما بو ولایتده اوتکزیلگن عملیاتلرنتیجهسیده طالبلردن 300 کیشی هلاک بولگنلیگینی بیلدیرهدی. خبرنامهده، طالبلرگه قرشی هوایی هجوم اوتکزیلگنلیگی ایتیلگن.
اما سلاموطندارگه مردمی منبعلرنینگ ایتیشیچه، حاضرهم قندوز شهریده طالبلرنینگ تسلطی بار و قاچیب – قورهب شهرده توقنه شوو بولیب قالهدی. منبع نینگ ایتیشیچه، قیزیل رومال بیلن یوزلرینی اورهگن طالبلرگه تیگیشلی گروه شهر کوچه لریده امنیتی کوچلر بیلن اوروشیب کیلماقدهلر.
شونینگدیک قندوز یشاوچیلری آذوقه و ایچه دیگن سوو قیینچیلیکلری بیلن روپهره بولگنلریدن شکایت قیلهدیلر. یشاوچیلرگه کوره، کیلهسی نیچه کونگه قدر شوقنه توقنهشوو دوام تاپگن صورتده قندوزنی یمان بیر فاجعه تهدید قیلیشی ممکن.
طالبلرنینگ قندوزگه هجوم قیلگنلری باعث، شهر یشاوچیلریدن یوزلرچهسی قوشنی ولایتلرده قاچیب چیقیشگه مجبور بولگنلر.
قاچقینلر وزیری سیدحسین عالمی بلخی هم اوتگن کون بیر شاشیلینچ اولتیریش آلیب بدرغه بولگن عایلهلرگه یاردم بیرهدیگن نهادلردن کومک ایستهدی.
قاچقینلر وزیرلیگینینگ خبرنامهسی گه کوره، اولکه شمالی ولایتلریدهگی سونگی ناتینچلیکلر سبب، تخاردن 2000 مینگدن آشه عایله، بدخشاندن 500 عایله و بغلاندن ایسه 400 دن آشه عایله باشقه ولایتلرده بدرغه بولگنلر.
قاچقینلر وزیرلیگی تامانیدن آلینگن اولتیریشده بین المللی نهادلر قندوز و باشقه ولایتلردن بدرغه بولگن عایلهلرگه تیزلیکده یاردم بیریش وعدهسینی بیرگن.
تخار خواجهغار تومنیده طالبلر هجومی
خواجهغار تومنینینگ باشلیغی ملاعمرنینگ سلاموطندار بیلن تیلفونی صحبت قیلیب ایتیشیچه، جمعه کون توشدن کیین طالبلر مذکور تومنده هجوم قیلگنلر. جناب عمرنینگ بیلدیریشیچه، امنیتی کوچلر طالبلرگه قرشی اوروشیب کیلماقده و طالبلر ایسه، بهارک قیشلاغیده قتیق اوروش قیلیب کیلماقدهلر.
خواجهغار تومنی باشلیغیگه کوره، توقنهشوولر جریانیده طالبلر آغیر تلفات کورگن، اما حاضرگه قدر بوگروه گه بیریلگن تلفات سانی انیق شکلیده قولده یوق.
جمعه کون ایرتهلب بدخشان و تخار یشاوچیلریدن یوزلرچه کیشی قندوز اهالیسی و امنیتی کوچلردن حمایت کورسهتیش اوچون تظاهرات قیلگن ایدیلر.
ایتیلیشیچه، وردوج تومنی طالبلر قولیگه توشیشی بیلن محل یشاوچیلری مذکور گروه تامانیدن بیزاته بولگن و دولتی مرکزلر ایسه هجومیگه آلینگن. طالبلر بوبارهده حاضرگه قدر بیرنرسه دیمهگن.
بغلاندهگی طالبلر تلفاتی
مرکزی بغلان تومنینینگ باشلیغی گوهرخان بابرینینگ سلاموطندارگه ایتیشیچه، اوتگن کیچهگی تشقی کوچلر هوایی هجومی نتیجهسیده، مذکور تومنده طالبلردن 15 کیشی هلاک بولگن. جناب بابری اوشبو گروه اعضالریدن کوپچیلیگی تن جراحت آلگنلیگیدن خبر بیرهدی، اما سانی قنچه کیشیگه ییتیشی بارهسیده بیرنرسه دیمهدی.
مرکزی بغلان تومنینینگ باشلیغیگه کوره، طالبلر بو تومن بیشینچی سرک ساحهسیدن امنیتی کوچلر اوستیگه اویوشتیرگن هجوملری، دولتی کوچلر تامانیدن خنثی بولگن و مرکزی بغلان تومنیده توقنهشوو شدت تاپگنلیگی معلوم قیلینهدی.
عین حالده، بغلان پولیس باشلیغی جنرال پردلی ولایت بُرکه تومنی و پلخمری شهریدهگی پولیس پوستهلریگه طالبلرنینگ هجوم ایلتگنیدن خبر بیرهدی. جناب پردلی نینگ ایتیشیچه، هجوم نتیجهسیده، ایکی پولیس قوشیمچه طالبلردن 12 کیشی هلاک بولگن و بیر پولیس قوشیمچه ایکی جنگری یرهلنگن.
بیرهفته دن بویان بغلان – قندوز شاه یولی چهارشنبه تیپه و جرخشک منطقهسیده طالبلر واسطهسی بیلن یاپیلگن و نیچه محلدن امنیتی کوچلرگه قرشی توقنهشیب کیلماقده.
5 کون آلدین (6- میزان) طالبلر قندوز شهریده نیچه تاماندن یوروش ایلتیب تصرف قیلگن ایدی و بو گروه هجوملری باشقه ولایتلر جملهدن تخار، بغلان و بدخشانده هم شدت بیلن دوام ایتیب کیلماقده.
