بامیانده اوقووچیلر و عایله اعضالریدن بیرقطاری، مذکور ولایت مکتبلریده مدیرلر و اوقیتووچیلر آرقهلی کلتکلنیب و کییملری ییرتیلیشیدن شکایت قیلگنلر. اولرنینگ ایتیشیچه، مملکت معارفی گه تیگیشلی ادارهلرده کلتکلش و هرقندهی قیناقلش منع ایتیلگن، بیراق بامیان مکتبلریدن بیرقطاریده، اوقووچیلر اوقیتووچیلری تامانیدن کلتکلنهدی.
بامیان مرکزیده 11- صنف اوقووچیسی زینب، اوقیتووچیلریدن قورقگنی باعث، مکتب دن آت توتمهی سلاموطندارگه ایتیشیچه، نیچه مرته اوزی و باشقهلرگه قرشی مکتب مدیری و اوقیتووچیلری تامانیدن قیناق و زوروانلیککه گواه بولگن.
زینب گه کوره، اوقیتووچیلر اوقووچیلرنینگ برماقلری آرهسیده قلم قوییب، خطکش و آغاچ بیلن کلتکلب و 7 کوندن 10 گچه غیرحاضر قیلیب، قیز اوقووچیلرنینگ کییملرینی ییرتیب و ساچلرینی کیسیب اولرنی قیناقلهیدیلر.
بامیانلیک اوقووچیلردن بیرقطاری نینگ ایتیشیچه، اوقیتووچیلردن بیرقطاری کلتکلش گه علاوه اولرنی آگاهلنتیریب و بو موضوع نی عایله اعضالری بیلن شریک قیلگن صورتده، ناکام یا-ده باشقه مکتب گه یوباریشی نی ایتهدی.
مذکور ولایتده اوقووچیلردن بیرینینگ آنهسی سهیلا، معارف وزیرلیگیدن تیزلیککه بامیان مکتبلریده اوقیتووچیلر تامانیدن اوقووچیلر کلتکلنیشی آلدی آلینیشینی سورهیدی.
بامیانده بالهلردن حمایت قیلووچی ترماق مسؤولی عارف محبی، مذکور ولایت مکتبلریده اوقووچیلر قیناقلهنیشینی تصدیقلب ایتیشیچه، مذکور اداره اورته اوقول مکتبلریدن بیری ده 9 اوقووچی قیز اوقیتووچیلری آرقهلی کلتکلنگنیدن نیچه ویدیو قولگه کیریتگن.
اونینگ ایتیشیچه، بو موضوع حل ایتیلیشی اوچون نیچه مرته دادخواهلیک قیلگن، بیراق حاضرگهقدر هیچ بیر نتیجه بیرمهگن.
بامیان معارف ریاستی سرپرستی ایوب امیری نینگ ایتیشیچه، اورگتیش و تربیهلش ادارهلریده هرقندهی قیناق منع ایتیلگن و حاضرگچه اوقیتووچیلر آرقهلی اوقووچیلر کلتکلنگنی و قیناققه سالینگنی توغریسیده مشخص بیر گزارش قولگه کیریتمهگن.
بامیان ولایتی بوییچه انسان حقلری ایرکین کمیسیونی بالهلر بولیمی مسؤولی عزیزالله رحمانی، اوقووچیلر کلتکلنیشی نی انسانی حقوق ارزشلریگه قرشی بیلیب ایتیشیچه، بو ایش اوقووچیلرنینگ روحی گه سلبی تأثیر قویهدی.
