حمایوی مرکز یا-ده تینچ اوی عایله‌وی زوروانلیککه قربان بولگن عیاللر اوچون حیات کیچیره‌دیگن مکان دیر.
کرونا ویروسی چیقگنی‌دن سونگ، عیاللرگه قرشی زوروانلیک‌لر کوپه‌گن و قربان بولگن‌لر عیاللردن بیرقطاری تینچ اویده انتقال بیریلگن.
راضیه و فریده 25 و 30 یاشر بولگن ایکی عیال نینگ مستعار نامی دیر. اولر قرنطینه کونلریده عایله‌وی زوروانلیک‌لر باعث تینچ اویده انتقال بیریلگن.
عایله‌وی زوروانلیک‌لرگه قربان بولگن عیاللردن بیری راضیه نینگ ایتیشیچه، قرنطینه کونلریده هرکون تورموش اورتاغی تامانیدن کلتک‌لنه‌ریدی. اونینگ ایتیشیچه، نیچه مرته تورموش اورتاغی تامانیدن کلتک‌لنگنیدن سونگ، قوشنی‌لری تامانیدن قوتقریلگن و نهایت‌ده تینچ اوی‌گه کیلگن.
عایله‌وی زوروانلیککه قربان بولگن‌لردن باشقه بیری فریده نینگ ایتیشیچه، سوو و ییگولیک اورنی‌ده اونگه کلتک نصیب بوله‌ریدی. او باش پناهی بولمه‌گنی باعث، تینچ اویده باریش‌گه مجبور بولگن.
بامیان ولایتی بوییچه عیاللر ریاستی مسووللری نینگ ایتیشیچه، اوشبو ولایتده سونگی ایکی آیده عیاللرگه قرشی زوروانلیک‌لر کوپه‌یگن. اولرنینگ ایتیشیچه، قرنطینه کونلریدن آلدین 10 کیشی تینچ اویده حیات کیچیره‌ریدی و حاضرده بو رقم ایکی برابر بولگن.
بامیان ولایتی بوییچه عیاللر ریاستی باشلیغی ذکیه رضایی نینگ ایتیشیچه، زوروانلیک‌لر چکه‌سیده، تینچ اویده انتقال بیریلگن عیاللرنی کرونا ویروسی هم تهدید قیله‌دی.
بامیان ولایتی بوییچه ساغلیق‌نی سقلش ریاستی باشلیغی سیدعلی‌آقا ناصری نینگ ایتیشیچه، زوروانلیک‌لرگه قربان بولگن‌لرنینگ کرونا ویروسی‌گه چلینمه‌یشی اوچون ییترلیچه تیارگرلیک آلینگن، بیراق اولرنینگ روحی نقطه‌نظردن وضعیت‌لری یمان دیر.
بامیان ولایتی بوییچه عیاللر ریاستی تامانیدن بیریلگن رقم‌لرگه کوره، اوتگن ییل عیاللرگه قرشی 161 زوراوانلیک واقعه رویخط گه آلینگن ایدی، بیراق ینگی ییل باشلنگنی‌دن حاضرگه‌قدر 32 زوروانلیک واقعه قید ایتیلگن.
