د بادغیس سیمه ییز چارواکي د دې ولایت امنیې قوماندانۍ ۷ لوړپوړي پولیس او یو ملکي کس په دې تور نیول شوي، چې په وسله والو طالبانو یې د قوماندانۍ مهمات پلورل.
په نیول شویو کسانو کې د قوماندانۍ د تخنیک امر، د وسلو او مهماتو د زېرمې مسوول، ۵ پولیس منسوبین او یو ملکي کس شامل دي، چې په طالبانو یې د کلاشینکوف مرمۍ پلورلې.
دغه تورن کسان د بادغیس ولایت د ملي امنیت له خوا نیول شوي دي.
د بادغیس د والي ویاند ظاهر بهاند سلام وطندار ته وویل، دغه کسان نن داسې مهال ونیول شول، چې ۵ زره ۵۸۰ ډزه د کلاشینکوف مرمۍ یې د قوماندانۍ د وسلو له زېرمې راویستلې وې او طالبانو ته یې لېږدولې.
بهاند وايي، چې نیول شویو کسانو په تېرو څلورو میاشتو کې ۷۵ زره ډزه د بېلابېلو وسلو مرمۍ په جعلي اسنادو د امنیې قوماندانۍ د وسلو له زېرمې راویستلي او په کمه بیه یې په طالبانو پلورلي دي.
د والي ویاند وايي، ډېر ژر به د دغو کسانو دوسیې سترې محکمې ته ورولېږي.
د بادغیس امنیې قوماندان عبدالروف د پېښې په تایید وايي، چې په نیول شویو کسانو کې ۷ پولیس او یو ملکي شامل دي، چې له ۵ کلونو راهیسې یې په طالبانو وسلې پلورلي دي.
تاج وايي، نیول شوی ملکي کس کمال نومېږي او د کابل ښار د څلورمې ناحیې استوګن دی.
د امنیې قوماندان پر وینا کمال د مهماتو راټولو او په طالبانو د پلورلو دنده پر غاړه لرله. قوماندانۍ وايي، چې نیول شویو کسانو په خپل جرم اعتراف کړی دی.
