د بادغيس د ولايتي شورا غړی بهاوالدین قادسي وايي، دا پېښه تېره شپه د مقر ولسوالۍ په سرخيان سيمه کې هغه مهال شوې ده کله چې امنيتي ځواکونو د طالبانو پر ضد شپني عمليات کول.
قادسي همداراز وايي، د يادو عملياتو په پايله کې يوه مېرمن او د هغې دوه ماشومان وژل شوي دي.
د بادغيس د ولايتي شورا د غړي بهاوالدین قادسي په وينا، د امنيتي ځواکونو په يادو عملياتو کې طالبانو ته هم مرګژوبله اوښتې ده خو په اړه يې کره معلومات نه لري.
په ورته وخت کې د بادغيس د والي مرستيال فیض محمد میرزازاده هم وايي چې په ياده سيمه کې عمليات شوي دي خو د اوښتې مرګژوبلې په اړه يې معلومات نه لري.
