افغانستان بوییچه ایکینچیلیک، سوو ییتکزیش و چارواچیلیک وزیرلیگی مسؤوللری، جاری ییل‌ده بوغدای حاصلی کوپه‌ییشی‌دن خبر بیرگن.
مذکور وزیرلیک‌نینگ ملی حسابات و معلومات اداره‌سی، بیرلشگن ملت‌لر تشکیلاتی‌نینگ ییگولیک آذیق-آوقت و ایکینچیلیک تشکیلاتی و خلق ارا آذیق-آوقت برنامه‌سی همکارلیگی بیلن اوتکزگن تیکشیروولری و رقم‌لریگه کوره، بو ییل مملکت‌ده بوغدای حاصلی اوتگن ییل‌گه نسبتن 42% گه آشیشی ممکن.
ایکینچیلیک، سوو ییتکزیش و چارواچیلیک وزیرلیگی سوزلاوچیسی اکبر رستمی نینگ ایتیشیچه، مملکت‌ده بوغدای حاصلی 42% گه آشگن صورتده، چیت‌ایل‌دن آلیب کیلینه‌دیگن 400 میلیون دالرلیک بوغدای آلدینی آله‌دی.
کابل‌ده اوتکزیلگن خبری بیر ییغینده جناب رستمی نینگ ایتیشیچه، بو ییل سوولی و للمه ییرلر ایکینچیلیگی و شونینگدیک، قطار ولایت‌لرده بوغدای ایکیلگن ییرلر کوپه‌یگن و بونگه علاوه، مملکت بویلب قولگه کیریتیله‌دیگن بوغدای حاصلی 5.1 میلیون تُن دن آرتیقراق تخمین ایتیلگن و بو رقم اوتگن ییل گه نسبتن 1.5 میلیون تُن آشگنینی کورسته‌دی.
ایکینچیلیک، سوو ییتکزیش و چارواچیلیک وزیرلیگی نینگ مسؤوللری گه کوره، جاری ییل کوپلب یامغیر یاغگنی، کود و تازه‌لنگن دانه‌لر وقتی‌ده ترقه‌تیلگنی، ایکینچی‌لرگه ییر هموار قیله‌دیگن لیزرلی اسکونه‌لر ترقه‌تیلگنی، ایکینچی‌لرگه پول‌سیز تراکتورلر بیریلگنی، مینگ‌لرچه تازه ییرگه سوو ییتکزیلگنی، ایکینزار ییرلر کوپه‌یگنی و مذکور وزیرلیک تامانیدن ایکینچی‌لرگه تعلیمات بیریلگنی باعث، بو ییل بوغدای حاصلی کوپه‌یگن.
