ایران جمهور رییسی حسن روحانینینگ تویتر صحیفهسیده یازیشیچه، ایران و دنیا آلتی قدرتی اورتهسیده هستهیی کیلیشووگه قول قوییلگن.
شونینگدیک، اتمی انرژی خلق ارا آژانسی باش مدیری یوکیا آمانونینگ ایتیشیچه، آژانس و ایران اورتهسیدهگی کیلیشوو متنیگه، جمهور رییس اورین باسری علی اکبر و ایران اتمی انرژی تشکیلاتی باشلیغی آرقهلی دولت نمایندهلیگیدن قول قوییلگن.
اسوشتیدپرس خبرنامهسی، غرب ییریک دیپلماتلرینینگ بیریدن نقل قیلیب خبر بیریشیچه، ایران و 5+1 گروهی مملکتلری اورتهسیده هستهیی کیلیشوولر حاصل بولگن. بو کیلیشوونی باشقه معلوماتی سونگی ساعتلرگه اعلام بولهدی. دستلبکی گزارشلرگه کوره، بو کیلیشوونی بیرقسمی ایران اتمی فعالیتلری هرتامانلمه تیکشیریلیشی دییلهدی.
شونینگدیک، رویترز خبرنامهسیدن نقل بولیب کیلیشیچه، ایران کیلیشوو لایحهسیده بیرگن سوزلریگه عمل قیلمسه، چیت ایللیک تحریملر ینه 65 کون ایچیده قیتهدن عملگه آشیریلهدی. و او بیش ییللیک تسلیحاتی تحریم و آلتی ییللیک موشکی تحریم بولیشی ممکن.
عین حالده، اسراییل باش وزیری بنیامین نتانیاهونینگ ایران اتمی کیلیشووی توغریسیده ایتیشیچه، ایران بیلن کیلیشیش تاریخ صحیفهسیده کته خطا دیر. بوندن آلدین اسراییل تشقی ایشلر وزیرلیگی اورین باسری، ایراننینگ هستهیی کیلیشووی توغریسیده خواطر بیلدیریب و اونی ایران برابریده تسلیم بولیش دیگن ایدی.
کورینیشیچه، ایراننینگ هستهیی کیلیشووگه قول تاپیشی، مذکور مملکتنینگ اقتصادی وضعیتی اوستیگه ایجابی تاثیر تشلهیدی. گزارشلرگه کوره، بو کیلیشوو بیرینچی ساعتلریده ایرانده آلتین قیمتی کوزگه کورینرلی شکلیده کمهیگن.
غرب مملکتلر و ایران اورتهسیدهگی هستهیی قرهمه قرشیلیک 12 ییلدن بویان دوام ایتکن و قرهمه قرشیلیک جریانیده امیریکه و بیرلشیکلری تامانیدن ایرانگه قرشی آغیر تحریملر عملگه آشیریلدی. بو کیلیشووده ایراننینگ اساسی تکلیفلریدن بیری، امیریکه تامانیدن برچه تحریملر کوتریلیشی ایدی.
