ایراندن سورگون ایتیلگن مهاجرلر بوتون نرسه‌لرینی قولدن بیریش‌لریگه قوشیمچه، مملکت‌گه قیتگن‌لریدن سونگ، بدرغه‌لیک و باش پناه‌سیزلیک‌ده حیات کیچیره‌دیلر و بوندن باشقه اَچینرلی و ایشانیلمس ایستده‌لیک‌لرنی اوزلری بیلن آلیب کیله‌دیلر.
یول جریانیده ساتیلیش و قولمه قول بولیش، اذیت بولیش، باج آلیش و برچه‌سیدن یمان خلق حضوریده یلنغاچلیک و جنسی زوره‌وانلیک‌که دوچ کیلیش، ایراندن افغانستان مهاجرلری آلیب کیلگن اینگ یمان ایستده‌لیک دیر.
یاشی یوقاری کیتگن نظام‌الدین آتلی بیرکیشی تازه‌لیک‌ده 14 یاشر باله‌سی بیلن هرات‌گه سورگون ایتیلگن. 75 یاشیده بولیب و کمیده بیر آی آلدین ایران کیتگن ایکن. او، بیر مینگ قیین‌چلیک بیلن اوزینی تهران‌گه ییتیشتیرگنیدن سونگ، ایران پولیسی تامانیدن قولگه آلنیب و هرات‌نی اسلام قلعه منطقه‌سیگه قیتیب کیلگن.
نظام‌الدین ایران چیگره کوچلری تامانیدن افغانستان یشاوچیلری اوستیگه بولگن زوره‌وانلیک و انسانی بولمه‌گن حرکت‌لریدن سوز یوریته‌دی و اونینگ بغضی تولیب ایتیشیچه، ایران چیگره کوچلری کمیده 200 الی 300 افغانستان یشاوچیسی‌نی توهین و حقارت قیلگنیدن سونگ، خلق حضوریده یلنغاچ قیلگن.
اونینگ ایتیشچه، اولر مینی ایسه یلنغاچ قیلماقچی بولدی، مین ایسه اولرگه ایتدیم، می‌نینگ اولدیرینگ‌لر، لیکن بو ایش‌نی حقیم گه قیلمنگیزلر. بو گپ‌دن سونگ مینی تینچ قویدیلر.
نظام‌الدین‌نینگ قولی بو حادثه‌نی حکایه قیله‌دیگن چاغیده تیتره‌یدی و کوز یاشی‌نی سورتیب ایتیشیچه، ایران کوچلری عیاللرنی هم یلنغاچ قیلماقچی بولدیلر، لیکن مهاجرلرنینگ جدی قرشی‌لیک‌لریگه روپه‌ره بولدی.
بو حادثه‌گه گواه بولگن نظام الدین‌نینگ یولداش‌لری بو حقده سوزلش‌دن وازکیچیشی اوچون حرکت قیلدیلر. بیراق، نظام االدین‌نینگ یوره‌گی ایران کوچلریدن توله ایکن.
صبریه «مستعار آت» اورته یاشیده بولگن قندوز یشاوچیلریدن دیر، او انسان قاچاقچی‌لرینی سوزی گه ایشانیب، بار یوقی‌نی ساتیب و اوچ باله‌سی بیلن ایران چیگره‌سی آرقه‌لی ترکیه کیتیش نیتیده ایکن. بیراق، ایران چیگره کوچلری تامانیدن اوشلنیب و هرات‌نینگ اسلام‌قلعه منطقه‌سیگه یوباریلگن.
صبریه کوزیدن یاش توکیب، ایران چیگره کوچلری‌نی قیلگن حقارتلریدن شکایت قیله‌دی و اونینگ ایتیشیچه، ایران کوچلری افغان‌لرنینگ بدرغه‌لیک‌لریدن سوء استعمال قیله‌دیلر. مهاجرت اَچیق‌لیگی صبریه‌دن سوزلش کوچی‌نی آلگن. او سورگون‌لنیش جریانیده 7 پوسته‌دن اوتگن و پولیس کوچلری هر بیر پوسته‌ده 70 الی 100 مینگ تومان باج آلگن.
اونینگ ایتیشیچه، ایران کوچلری بالهلرنی آته و آنه‌لریدن کوپراق پول آلیش اوچون، اولرنینگ کوزلرینی قرشی‌سیده کلتکله‌یدیلر.
صبریه‌نینگ ایتیشیچه، یوزلرچه افغان یشاوچیسی پولی بولمه‌گنی سبب، آی لرچه قرارگاه لرده حبس بولیب، آغیر ایش‌لرگه مجبورلنه‌دیلر.
ایران‌ده مهاجر بولگن افغان یشاوچیلری‌نینگ اچیق حکایه‌لری، یالغیز پولیس حقارتی‌گه توگلمیدی، بلکیم انسان قاچاقچیلری هم مهاجر و بدرغه‌لرنی زورله‌یدیلر.
فهیم 15 یاشیده بولگن باله دیر او خاله‌سی‌نینگ اوغلی بیلن ایراندن سورگون ایتیلگن. او پاکستان و نیمروز چیگره‌سی تامانیدن نیچه مرته انسان قاچاقچیلری، قورالی اوغری‌لر و پاکستان محلی پولیسی قولیگه آلیب ساتیلگن، نهایت‌ده 12 کون‌دن کیین اوزینی ایران‌ده ییتیشتیرگن.
فهیم اوشبو یولده، قاچاقچیلر تامانیدن بالهلرنی جنسی زولنیشی‌گه گواه بولگن.
اونینگ ایتیشیچه، قاچاقچیلر برچه پول لریمیزنی آلدیلر، برچه کیشی لرنی حتی عیاللرنی هم کلتک‌لب بالهلرنی جنسی زورله‌دیلر و نهایت‌ده بیزلرنینگ پاکستان کوچلری‌گه ساتدیلر. پاکستان کوچلری هر بیرکیشی‌دن 100 مینگ تومان پول آلیب و بیزلرنینگ ایران قاچاقچی‌لری‌گه بیردیلر.
هرات ولایتیده بدرغه بولگن‌لر ریاستی باشلیغی جاوید نادم‌نینگ ایتیشیچه، اوتگن ایکی آی ایچیده کمیده 24 مینگ افغانستان یشاوچیسی سورگون ایتیلگن و اوشبو کیشی‌لرنینگ آره‌سیده 409 باله و 12 عیال هم شامل دیر.
هرات‌ده انسان حقلر کمیسیونی باشلیغی عبدالقادر رحیمی‌نینگ ایتیشیچه، بالهلرنی مملکت ایچیده قاچاق ایتیلیشی مافیایی گروه‌لر تامانیدن بجریله‌دی .
رحیمی جنابلری، ایران‌ده بولگن افغانستان یشاوچیلرینی انسانی حقلر وضعیتیدن خواطرلنیب ایتیشیچه، ایران‌ده افغانستان سیاسی نمایندلیک‌لری مملکت یشاوچیلرینی انسانی حقلر وضعیتی‌نی تیکشیریب و ایران نماینده‌لری بیلن سوزلش‌گه مجبورلر.
رحیمی‌نینگ ایتیشیچه، انسان قاچاقچیلری 10 الی 18 یاشیده بولگن بالهلرنی آلده‌ته‌دیلر و اولر فایده‌لنیش اوچون باشقه مملکت لرده قاچاق قیله دیلر.
بالهلرنی قاچاق ایتیش فاجعه‌سینی عاقبت‌لرنی حساب‌گه آلگن بیر چاغده، افغانستان قانون توزتوچیلری جزانینگ 511نچی ماده سی نینگ 2 نچی فقره سیده، بالهلرنی قاچاق ایته‌دیگن کیشی‌لر حقیده ایتیشیچه: « قاچاق بوله دیگن کیشی باله یا ده عیال بولگنده یا ده اولرنینگ اوینه‌تیب فایده‌لنگن حالده، مجرم اون ییل دن کوپراق حبس‌گه محکوم بوله دی».
بیراق هرات والیسی سوزلاوچیسی جیلانی فرهادنینگ ایتیشیچه، حاضرگچه افغانستان یشاوچیلری ایران چیگره کوچلری تامانیدن حقارت بولیشی حقیده، هیچ قندی شکایت کیلمه‌گن و بو حقده شکایت کیلگن بیرچاغده، ایران رسمیلری بیلن سوزلشولری ممکن.
هرات‌ده ایران سیاسی نماینده‌لیگی، افغانستان یشاوچیلری اوشبو مملکت چیگره کوچلری تامانیدن حقارت بولیشی‌نی رد ایتیب ایتیشیچه، قانونی حجت و پاسپورتی بولمه‌گن کیشی‌لرگه ایران ده یشش حقی بیریلمه‌ی و مملکت‌لری گه قیتیش‌لری کیره‌ک.
مهاجرلر و انسان قاچاق بولیشی حقیده بولگن جنایت‌نی رویخط‌گه آلیش، قاچاق قربانلرینی حمایت قیلیش و سقلش اوچون ایجابی آدیم حساب‌لنه‌دی؛ بیراق قانون حاکم بولمه‌گنی و قاچاقچی‌لرنینگ اوستیدن تدقیقات اوتکزیلمه‌گنی باعث، قاچاقچیلر کینگ شکلده فعالیت قیله‌دیلر.
