"اوگی آنه" رمانی‌نی تورکیه‌لیک یازووچی احمد لطفی قازانچی یازگن. اوشبو رمان یولداش ایش بیک طرفیدن اوزبیکستان‌ده اوزبیک تیلی‌گه اوگیریلگن.
افغانستان‌لیک اوزبیک ژورنالست محمدحسن تولقین اوشبو کتاب نینگ اوزبیکچه متنی‌نی کریل یازووی‌دن عرب الفباسی‌گه اوگیریب نشر ایتگن ایدی. بیر مینگ تیراژده "تعلیمی اتشارات موسسه‌سی" تامانیدن چاپ ایتیلگن "اوگی آنه" رمانی نینگ افغانستان بویلب اوزبیک کتاب خوانلر قولیگه ییتیب بار گنی‌دن کوپ وقت اوتمه‌یدی.
چیرایلی کورینیشده نشر ایتیلگن مذکور کتاب اوزبیک کتاب‌خوانلر اینیقسه اوزبیک یاشلری تامانیدن کته قیزیقیش بیلن کوتیب آلینگن ایدی. 189 صحیفه‌نی اوز ایچیگه آلگن "اوگی آنه" رمانی نینگ افغانستان نشری‌گه اوزبیک تیلشناس و یازووچی استاد عزیزالله آرال سوز باشی یازگن.
اوشبو مقدمه‌نینگ بیرقسمی‌ده منه بولرنی اوقییمیز… "عمرینگیزده بیر بار هم یخشی‌لیک قیلیش‌نی اویلب کوردینگیزمی؟ اوشنده کتاب اوقینگ. یامان‌لیک قیلیش اوچون کتاب اوقیمس‌لیک‌نی اوزی ییترلی. کوکره‌گیم‌نی کوتاریب یوره‌من دیسنگ، اوز یورتیم‌ده مسافر بولمه‌یمن دیسنگ کتاب اوقیگین.
تا سین کیم‌لیگن‌گنی بیلمه‌سنگ یورتینگ آباد بولمه‌یدی. تا سین کیم‌لیگن‌گنی بیلمه‌سنگ، هیچ کیم سینی تانیمه‌یدی.
بونینگ مربی‌سی ایسه اینگ اولا کتاب قاله ویرسه اوشه شخص‌نینگ اوزی بوله‌دی. اگر 21- عصرکروانی‌دن آرقه‌ده قالمه‌ی دیسنگ، معنوی قشاق‌لیکنی ایلدیزدن یوق قیلماقچی بولسنگ، قُول بولمه‌ی حُر بولماقچی بولسنگ، علم – معرفت‌نی ایگللش‌گه جزم قیلسنگ، مکمل حیات‌نی – آسایشته‌لیک و سعادت‌نی هیچ کیم ساوغه قیلمه‌یدی.
اونگه هر کیم اوز ساحه‌سیده بیراو بیلیمی بیلن، بیراو عقلی بیلن ایریشه‌دی. ادبی اثر یازیش اوچون شبهه سیز استعداد کیره‌ک بولگنی کبی، اونی اوقیش اوچون هم کتاب‌خوانده اوقیش مهارتی بولیشی کیره‌ک. اوقیش فقط کتاب اوقیش بیتیریش ایمس، بلکه یازووچی نینگ زحمتی‌نی توشونیب ییتیش و اوقیگنی‌دن پند آلیش – اورگه‌نیش هم دیر.
سیزعزیز کتاب‌خوانلرگه بو اثر و اثرلرنی اوقیب، معنوی آذوقه آلیشینگیزنی تیلب قاله‌من." کمینه اوشبو رمان‌نی نشرگه تیارلش جریانیده هم و چاپ ایتیلیشی‌دن سونگ هم اوقیگن من. "اوگی آنه" رمانی مین هلی گچه اوقیگن بدیعی ادبی اثرلردن مینگه کته تاثر قالدیرگن کتاب‌لردن بیری حسابلنه‌دی.
زبردست یازووچی احمد لطفی قازانچی قلم تیبره‌تیشی نتیجه‌سیده یره‌لگن اوشبو اجتماعی – اخلاقی رمان‌نی شرقی خاندانلرده حیات کیچیره‌دیگن هر بیر کیمسه‌نی بیر مرته اوقیشی لازم. چون که شرقی خاندانلر اینیقسه بیز اوزبیک‌لر حیات کیچیره‌دیگن جمعیت‌ده کوپ خاتین‌لیک، ایریم عایله‌لرده اوگی فرزند بیلن یانده‌شیش گاهی‌ده بعضی بیر جدی معمالرنی وجودگه کیلتیره‌دی.
رمانده یازووچی، ایری نینگ ایکینچی عیالی بولیب تورموش‌گه چیققن مسلمه عیال فاطمه‌نی اوزی نینگ اوگی فرزندی حسین بیلن اوته عالی و انسانی سویه‌ده یانده شووی، اونگه بیرگن صمیمی مهر و محبتی رمان‌نینگ حقیقی قهرمانی اوله‌راقنی گوده‌لنتیره‌دی.
او، مکمل بیر انسان صفتی‌ده هر بیر خواننده نینگ کوز اونگیده مجسم بوله‌دی. رمانده مؤلف نینگ اوز قهرمانی نینگ کونده‌لیک حیاتده‌گی عجایب فعل و اطواری اینیقسه حسین‌گه نسبتن دنیا بویلب هیچ بیر اوگی آنه اوچون معمول بولمه‌گن مهربان‌لیگی نینگ عجایب تصویرلنیشی اونینگ استعدادلی یازووچی ایکنی‌دن درک بیره‌دی.
بیزنینگ جامعه میزده اوشبو رمان‌نی اینیقسه عیال خواننده‌لر تامانیدن دقت بیلن اوقیلیشی‌نی توصیه ایته‌میز. چون‌که کتاب نینگ مضمونی در واقع هر بیرعایله‌نی تشکیل ایتیشده مهم عنصر سنلگن عیال‌لرگه قره‌تیلگن.
عیال‌لری اوقیمیشلی، مفکوره‌سی و دنیا قره‌شی تیرن، اخلاقی گوزه‌ل و صمیمی بولگن جمعیت رواجلنه‌دی – اجتماعی معمالری کم بوله‌دی. در واقع فاطمه خانم نینگ رمانده‌گی موقعی و اورنی هر بیر عیال ذاتی اوچون اورنک بولیشی کیره‌ک.
بیزنینگ عایله‌لرده اوشبو کتاب قنچه کوپ اوقیلسه جمعیت نینگ اخلاقی، فعل و خویی‌گه شونچه کوپ ایجابی تاثیر قالدیریشی ممکن. بیزده کتاب اوقیش مدنیتی عمومن آلگنده افغانستان‌ده کتاب اوقیش مدنیتی رواجلنمه‌گنی باعث بیز اوزبیک‌لر آره‌میزده هم مطالعه و کتاب اوقیش لیککه قیزیقیش احوالی یخشی ایمس.
افغانستان‌لیک اوقیمیشلی انسانلرنینگ مینگته‌دن بیری بیر ییلده بیته کتاب اوقیمه‌یدی دیسک مبالغه قیلمه‌گن بوله‌میز. هیچ کیم کتاب اوقیش اهمیتی‌نی رد ایتمسه کیره‌ک. کتاب‌خوانلیک مدنیتی یخشی‌لیگی و جمعیت‌ده‌گی مهم رولی‌نی هم یخشی انگلب ییتگن حالده هم مطالعه قیلمه‌یمیز. اوشبو مشکل بیز اوچون و نسلی‌میز کیله‌جگی اوچون دهشت‌لی بیر فاجعه حسابلنه‌دی. بو اورینده اونده نیمه قیلیش کیره‌ک؟ دیگن سوراق اوز اوزیدن پیدا بوله‌دی. اوشبو سوال‌گه قوییده‌گی ایشلرنی عمل‌گه آشیریش معقول جواب بولیشی ممکن.
بیرینچی‌دن یاشلرنی کتاب اوقیش‌لیککه ترغیب ایتیش کیره‌ک. عاموی اخبارات واسطه‌لری، رادیولر و تلویزیونلر آرقه‌لی کتاب‌خوانلیک بارهسیده قیزیقرلی بحث‌لرنی تشکیل‌لشتیریش لازم. یاشلر نماینده‌لرینی اوشبو بحث‌لرده قتنه‌شیشلری اوچون شرایط یره‌تیش ضرور.
یخشی و مهم کتاب‌لرنی هر دایم تنیشتیریب باریش فایده دن خالی ایمس. کتاب‌خوانلیک تیوره‌کلرینی اویوشتیریش و اوشبو تیوره‌کلرده بیرگه‌لیکده کتاب‌خوانلیک کیچه‌لری و هفته‌لرینی اوتکزیش همده یاشلرنی مطالعه‌گه تشویق ایتیش نینگ باشقه بیر یولی سنله‌دی. هیچ بولمه‌گنده "هر بیر کیشی‌نی بیر آیده بیر کتاب اوقیشی شرط" دیگن شعارنی قوللش آرقه‌لی کتاب‌خوانلر رویخطی‌نی کینگه‌یتیریب باریش ممکن. "اوگی آنه" رمانی‌نی مملکتی‌میز اوزبیک یاشلری قولیگه ییتکزیب، اولرگه اوشبو کتاب‌نی بیرینچی بار مطالعه ایته‌دیگن کتابلری قطاریگه قویشلرینی توصیه ایتیش هم ثوابلی ایش بوله‌دی.
