غزنی ولایتی کینگش باشلیغی خالقداد اکبرینینگ ایتیشیچه، زابلده اوغیرلنگن یوللاوچیلردن 19 تهسی دوشنبه کونی ایرتهلب غزنی ولایتی جاغوری تومنیده قویب یوباریلگن.
جناب اکبرینینگ سلاموطندارگه ایتیشیچه، یوللاوچیلرقالگنی ایکینچی مرته قوییب یوباریلیشی کوتیلهدی.
شونینگدیک غزنی ولایتی کینگش باشلیغینینگ کوپهیتیریشیچه، جاغوری تومنی رسمیلری، قویب یوباریلگن یوللاوچیلرنی آلیب کیلیش اوچون جاغوری مرکزیده بارگنلر. مذکور یوللاوچیلر شوحاضر جاغوری مرکزیده ایکنلیگی ایتیلگن. اونگه کوره، اولر قول تلیفون ایش بیرمه یدیگن محلدهلیگی ایتیلهدی.
اما غزنی محلی رسمیلرینینگ ایتیشیچه، بو یوللاوچیلر غزنی ولایتی جاغوری تومنی بیلن زابل چیگره سیده تبادله بولیشی کوتیلردی. ولی قوییب یوباریلگن 19 یوللاوچی توغری سیده انیق معلومات بیریلمهگن.
اوتگن ییل حوت آی نینگ 4- سیده دوشنبه کونی نقاب کییگن قوراللی شخصلر31 یوللاوچینی کابل – قندهار قتناو شاه یولی زابل ولایتیگه تیگیشلی منطقه سیده ایکی بس موتر یوللاوچیلری ایچیدن اجرهتیب اوزلری بیلن آلیب کیتگن ایدیلر.
ایتیلیشیچه، بو یوللاوچیلر هزاره قومیگه تیگیشلی بولگنی باعث، مذکور شخصلر تمانیدن اوغیرلنگن ایدی.
زابل ولایتی محلی رسمیلری اوشبو واقعهدن بیرکون اوتیشی بیلن مذکور یوللاوچیلر داعش جنگریلر تمانیدن اوغیرلنگن دیب ادعا قیلینگن ایدی. اولرگه کوره، اوغیرلاوچیلر فارسی و پشتودن باشقه تیلگه سوزلهشلردیلر.
بیراق اوندن کیین زابل ولایتی کینگش اعضالری اوغیرلاوچیلرنی محلی طالبلرگه تیگیشلی بولگنینی ایتکنلر. حاضرگه قدر اوشبو یوللاوچیلر قیسی بیر گروه تمانیدن اوغیرلنگنی بیللی ایمس.
بو یوللاوچیلر اوغیرلنگندن نیچه کون ییکن امنیتی کوچلر اولرنی قوتقریش اوچون زابل ولایتی خاک افغان تومنیده عملیات یولگه قویدی. اما جایلری انیق بولمهگنلیگی باعث عملیات توختهتیلدی.
اوندن کیین بیرقطار رسمیلر، مذکور یوللاوچیلر کیچیک گروهلرگه اجرهلیب نامعلوم ییرلرده سقلهنیشینی ایتیلردی.
شونینگدیک مذکور یوللاوچیلرنی اوغیرلنگنیدن کمیده ایکی آی اوتکندن سونگ زابل ولایتی کینگش باشلیغی عطاجان حقبیان، مذکور یوللاوچیلر قوتقریش توغری سیده امنیتی کوچلر تمانیدن عملیاتلر باشلنگنیدن خبر بیرگن ایدی، اما عملیات نتیجه بیرمهگن ایدی.
یوللاوچیلر اوغیرلنیشی اولکه ایچکری و تشقری سیده کینگ ناراضلیکلرگه روپهره بولدی. ناراضچیلر اوشبو موضوع توغری سیده ملی بیرلیک حکومتینینگ دقت سیزلیککه عیبلب، مذکور یوللاوچیلر قوییب یوباریلیشی خصوصیده تیزلیکده ایشگه کیریشلرینی سورهدیلر.
جمهور رییس غنی یوللاوچیلر توغری سیده بیر مدت جیم توردی، اوندن کیین مذکور جیم قالیشنی حکومت استراتیژیسی دیب، حکومت کوچسیزلیگی ایمسلیگینی ایتدی.
بو یوللاوچیلر عایله اعضاسی و مدنی فعاللر کمیده ایکی آی کیتمه کیت ناراضلیکلرنی یولگه قوییب، کابلده تحصن خیمهسینی تیکگن ایدیلر.
عبدالله عبدالله نیچه کوندن کیین تحصن خیمه سیگه اولتیرگن ناراضچیلر بیلن اوچرهشیب، مذکور یوللاوچیلر قوییب یوباریلیشی خصوصیده حکومت کوره شوولرینی تیلگه آلدی.
دیمک؛ حاضرگه قدر دولت رسمیلری یوللاوچیلرنی کیملر بیلن المشتیرگنلیگی انیق ایمس.
