افغانستان کرکت بوردینینگ ایتیشیچه، کرکت ملی تیمینینگ مربیسی انضمامالحق، پاکستاننی ملی منفعتی اوچون، مذکور اداره دن استعفا بیریب و آز امتیاز بیلن پاکستاننی کرکت ادارهسیگه قوشیلگن.
پاکستانلیک میدیاگه کوره، اوشبو مملکت انضمامالحقنینگ پاکستاننی کرکت بورد تنلش ادارهسی باشلیغی صفتیده تعیین قیلگن.
افغانستان کرکت بوردی تامانیدن ترقهتیلگن خبرنامهده کیلیشیچه، دیمک انضمامالحقنینگ استعفاسی اداری لایحهگه قرشی بولگن، بیراق اولر، پاکستاننینگ کرکت ادارهسی بیلن یخشی علاقهده بولگنی باعث، بو استعفاءنی قبول قیلگن.
اوشبو خبرنامه اساسیده، انضمامالحق اوچ آی آلدین استعفا بیریشی لازم ایدی و افغانستان کرکت بوردی اونینگ اورنیگه باشقه بیر کیشینینگ تعیین ایتیش خصوصیده اویلردی.
افغانستان کرکت بوردینینگ ایتیشیچه، هر بیر شکلده، تیزلیکده جناب انضمامالحقنینگ اورنیده ینگی مربی تعیین ایتیلهدی.
بوندن آلدین، پاکستاننی «جیو» تلویزیونینینگ گزارش بیریشیچه، انضمامالحق پاکستاننی کرکت بوردی بیلن کیلیشگن و (دوشنبه کون) تنلش اداره باشلیغی صفتیده ایشیگه باشلهیدی.
آلدینگی تفصیلاتلر
پاکستاننی «جیو» تلویزیونینینگ تویتر صحیفهسیده، افغانستان کرکت ادارهسی اجراییه باشلیغی شفیقالله استانکزیدن نقل بولیب یازیلیشیچه، انضمامالحق، مذکور ادارهنینگ کیلیشووی اساسیده، جاری میلادی ییلنی نومبر آییگچه افغانستان کرکت ملی تیمینینگ مربیسی صفتیده ایشلهشی لازم ایدی، بیراق او، بو کیلیشوونی نظرگه توتمهگن.
افغانستان کرکت بوردینینگ فیسبوک صحیفهسیده، مذکور ادارهنی عمومی باشلیغی نسیمالله دانش دن نقل بولیب یازیلیشیچه، کرکت بورد دن کیتیش یا-ده قالیش توغریسیدهگی قرار، جناب انضمامالحقنینگ اوزیگه تیگیشلی بولهدی و او، هر بیر قرار قیلگنده، بو اداره تامانیدن خوش قرشیلنهدی.
بیراق پاکستان میدیاسی نسیمالله دانشنینگ بیاناتلریگه قرشی شفیقالله استانکزی دن نقل قیلیب گزارش بیریشیچه، انضمامالحق رسمی شکلده استعفاسینی مذکور اداره بیلن اورتهگه قویمهگن و یالغیز تلیفون آرقهلی جناب دانشگه خبر بیرگن. جناب استانکزینینگ ایشانچیگه کوره، بو ایش جناب انضمامالحق بیلن افغانستان کرکت بوردی اورتهسیده قول قوییلگن کیلیشووگه قرشی بولگن. جناب استانکزی، انضمامالحقگه قرشی قضایی لایحه ایجاد ایتیلگنیدن هم خبر بیرگن.
لیکن پاکستان میدیالرینینگ نیچه کون کیین گزارش بیریشیچه، انضمامالحق استعفاسینی کتبی شکلده افغانستان کرکت بوردیگه تاپشیرگن.
پاکستاننی اکسپرس کوندهلیگینینگ گزارشیگه کوره، اوشبو مملکت کرکت ادارهسی، تنلش ادارهنینگ حاضرگی باشلیغی هارون رشیدنینگ 500 مینگ پاکستانلیک کلدار معاشیدن آشهراق انضمامالحقگه معاش بیریش خصوصیده قرار قیلگن. اوشبو ادارهنینگ ایتیشیچه، اونگه 12 لک کلدار حقوق بیریشگه قادر ایمس دیر. گزارشلر اساسیده، افغانستان کرکت بوردی باشقه امتیازلر یانیده، آییده انضمامالحقگه 12 لک کلدار حقوق بیرهدی ایکن.
باشقه تاماندن ایتیلیشیچه، پاکستان کرکت بوردی، افغانستان کرکت ادارهسیگه باشقه بیر پاکستانلیک مربینی تکلیف قیلگن، بیراق اوشبو اداره حاضرگچه بو توغریده فکر بیلدیرمهگن.
پاکستاننی سپورت خبرچیسی عرفان ختکنینگ سلاموطندارگه ایتیشیچه، انضمامالحقگه نسبتن پاکستاننینگ علاقه مندلیگی، انضمامالحق افغانستان کرکت ملی تیرمه جماعهسیگه کوپینچه یوتوقلر قولگه کیریتگن بیرچاغده کوپهیگن.
