قطرده طالبان گروهی نینگ سیاسی دفتری نی نماینده‌لری، بیر قطار مملکت‌لرگه سفر قیلگنیدن سونگ، آمریکا و طالبان گروهی نینگ نماینده‌لری آره‌سیده تینچلیک سوزلشوولری غیررسمی شکلده دوام ایتیب باره‌یاتگنی توغریسیده گزارشلر ترقه‌تیلدی.
افغانستان ملی خوفسیزلیک ریاستی نینگ سابق باشلیغی و جمهورلیک ریاست سیلاوی نینگ نامزدلریدن بیری رحمت‌الله نبیل سلام‌وطندار بیلن اوتکزگن خاص صحبتیده ایتیشیچه، طالبان، بو گروه نی 5 مینگ محبوس اعضاسی نینگ رویخطی نی آمریکاگه تاپشیره دی. آمریکا ایسه افغانستان حکومتی دن بو محبوس‌لر قوییب یوباریلیشی نی طلب قیله‌دی.
عین دمده، حکومت ییریک رسمی‌لریدن بیری آتی فاش ایتیلیشی‌نی ایستمه‌ی سلام‌وطندارگه ایتیشیچه، حکومت و طالبان آره‌سیده‌گی تینچلیک سوزلشوولریده محبوس‌لر قوییب یوباریلیشی و باشقه موضوعلر بحث گه آلینیشی طبیعی دیر، بیراق بونده‌ی سوزلشوولر باشله‌نیشی کمیده بیر آی آتیش‌کیسین بیلن بوله‌دی. اوشبو منبع نینگ انس حقانی قوییب یوباریلیشی توغریسیده ایتیشیچه، آمریکا و طالبان نماینده‌لری آره‌سیده بحث ایتیلگن موضوعلر افغانستان حکومتی گه باغلیق بولمه‌یدی.
بوندن آلدین، جمهور رئیس غنی نینگ ایتیشیچه، طالبان گروهی نینگ کمیده بیر مینگ محبوسی قماقخانه‌لردن قوییب یوباریلیشی ممکن.
عین حالده، طالبان گروهی نینگ سابق اعضالریدن بیری مولوی قلم‌الدین نینگ ایتیشیچه، طالبان گروهی افغانستانلیک‌لر ارا سوزلشوولرده ارایه ایتیش اوچون ایلگریدن اوشبو گروه نی 5 مینگ محبوس اعضاسی نینگ رویخطی نی تیارلگن ایکن.
اونگه کوره، انس حقانی کیله‌جک نیچه کونده ایکی آمریکایی‌لیک اوقیتووچی نینگ برابریده قوییب یوباریلیشی ممکن.
طالبان گروهی نینگ اوشبو سابق اعضاسی نی کوپه‌یتیریشیچه، آمریکا و طالبان نماینده‌لری آره‌سیده توخته‌تیلگن تینچلیک سوزلشوولری، جمهورلیک ریاست سیلاوی نینگ نتیجه‌سی اعلان ایتیلگنیدن سونگ، قیته باشلنه‌دی.
عین حالده، سیاسی ایش بیلرمان وحید مژده نینگ ایتیشیچه، طالبان گروهی افغانستانلیک‌لر ارا سوزلشوولرده ارایه ایتیش اوچون ایلگریدن بو گروه نی 5 مینگ محبوس اعضاسی نینگ رویخطی نی تیارلب قویگن ایکن.
سیاسی ایش بیلرمان وحید مژده هم انس حقانی قوییب یوباریلیشی‌نی تصدیقلیدی. انس حقانی ایکی آمریکایی‌لیک اوقیتووچی نینگ برابریده قوییب یوباریله‌دی.
عین دمده، جمهور رئیس سوزلاوچیسی صدیق صدیقی نینگ ایتیشیچه، انس حقانی افغانستان ملی خوفسیزلیک قماقخانه‌سیده دیر و اونینگ قوییب یوباریلیشی توغریسیده حاضرگچه هیچ بیر قرار آلینمه‌گن.
اوشبو بیانات‌لر اورته گه چیققن بیرچاغده، اوتگن کون جنوبی آسیا ایشلری بوییچه آمریکا تشقی ایشلر وزیرلیگی نینگ اورین باسری، جمهور رئیس غنی بیلن اوچره‌شگنده، انس حقانی قوییب یوباریلیشی و تینچلیک سوزلشوولری توغریسیده بحث قیلگن.
طالبان گروهی نینگ 5 مینگ محبوسی قوییب یوباریلیشی خصوصیده بولگن رویخط فاش ایتیلگن بیرچاغده، بوندن آلدین غرب میدیالریدن بیرقطاری، 4 هفته دن کیین آمریکا و طالبان گروهی نینگ نماینده‌لری آره‌سیده تینچلیک سوزلشوولری قیته‌دن باشله‌نیشی توغریسیده گزارش بیریشگن ایدی.
شو توغریده…
نبیل: دولت قوروچی تیمی بایومتریک ایتیلمه‌گن آوازلرگه اعتبار بیریلیشی‌نی ایسته‌یدی
