انسان حقوقی ایرکین کمیسیونی ینگی بیر گزارش آرقهلی ایتیشیچه، قویاش 1398- ییل 25- میزاندن 1399- ییل 23- سرطان گچه 17 خودکش هجوم، ماین پارتلهش، ریجهلنگن قتل، مسجدلر، درمسال، ملااماملر و نماز ادا قیلهدیگنلر ناتانیش قوراللی کیشیلر و طالبان جنگریلری آرقهلی اوق آستیده آلینیشی عاقبتیده، 170 کیشی هلاک و باشقه 272 کیشی ایسه یرهلنگن.
مذکور گزارش بوگون (شنبه 28- سرطان) نشر قیلینگن کیم اونگه کیلیشیچه، هلاک ایتیلگنلر آرهسیده 5 ملا امام و 14 باله هم شامل دیر و شونینگدیک مذکور هجوملرده 22 باله یرهلنگن.
مذکور گزارش گه کیلیشیچه، بالهلرگه کوپینچه تلفات ییتیشگن و شونینگدیک قربانیلرنینگ آرهسیده عیاللر هم شامل دیر.
انسان حقوقی ایرکین کمیسیونی نینگ ایتیشیچه، تینچاهالی تلفاتی کوپهیگنی بو نهاد نینگ هردایم خواطرگه سالگن و اوروش تامانلریدن انسانی حقلر و یشاوچیلیک حقلری رعایت قیلینیشی و شونینگدیک خلقارا انسان دوستلیک قاعده و قانونلری نی مراعات قیلیش بیلن تینچاهالی و حربیلرگه قرشی هجوم توختهتیلیشی سورهلگن.
انسان حقوقی ایرکین کمیسیونی تینچاهالی ریجهلنگن شکلده هلاک ایتیلیشی اینیقسه مذهبی ییرلر، عبادتگاهلر، دین عالملری و نماز ادا قیلهدیگنلر هجوم آستیده آلینیشی خلقارا انساندوستلیک حقلری گه قرشی و اوروش جنایتی دیگن.
مذکور گزارش اساسیده، اوشبو هجوملرنینگ کوپینچه قربانیلری، نماز ادا قیلهدیگنلر، بالهلر و دین عالملری دیر کیم اولرنینگ برچهسی تینچاهالی تانیلگن و انسانی و یشاوچیلیک حقلری و شونینگدیک خلقارا انسان دوستلیک قانونی اساسیده، اولرگه قرشی هجوم منع قیلینگن.
اوشبو کمیسیون افغانستان دولتیدن مذهبی ییرلرنی سقلهش و نماز ادا قیلهدیگنلرنینگ خوفسیزلیگی نی تأمین ایتیش بیلن اوشبو مملکتده عقیده و نطق ایرکینلیگیدن کوپراق مراقبت قیلیشی و شونینگدیک امنیتی، عدلی و قضایی ادارهلردن حادثه عامللری قولگه آلینیشی اوچون هرتامانلمه تحقیق قیلیشی نی سورهگن.
