افغانستان بوییچه انسان حقوقی ایرکین کمیسیونی، مملکت ده اوروش طرفلریدن آتیشکیسین گه قیته تیکلب و افغانستانلیکلر ارا تینچلیک سوزلشوولری باشلهنیشی گه زمینه یرهتیشلرینی سورهدی.
بوگون «سهشنبه، 6- جوزا» مذکور کمیسیون تامانیدن نشر قیلینگن خبرنامه ده ایتیلیشیچه، اوروش طرفلری یشاوچیلرنینگ خوفسیزلیگی و جانلرینی سقلش برابریده مسؤول دیر و شو یوزهدن آتیشکیسین چوزیلیشی کیرهک.
اوشبو اداره نینگ خبرنامهسیده کیلیشیچه: «افغانستان بوییچه انسان حقوقی ایرکین کمیسیونی، آتیشکیسین گه قیته تیکلهنیشی، دوام ایتیشی، افغانستانلیکلر ارا سوزلشوولر باشلهنیشی گه زمینه یرهتیلیشی، اوروش یکونلنتیریلیب و تینچلیک بولیشی، یشاوچیلرنینگ خوفسیزلیگی و جانلری سقلهنیشی اوچون زوروانلیکلر کمهیتیریلیشینی ایستهیدی.»
شوندهی بیرحالده، طالبان گروهی «شنبه کیچه، 3- جوزا» بیر اعلامیه نشر قیلیب اوچ کون روزه هییت بیرهمی جریانیده آتیشکیسین اعلان قیلدی.
طالبان نینگ اعلامیهسیدن سونگ، جمهور رئیس غنی خوفسیزلیک کوچلری گه اوچ کون هییت ده آتیشکیسین قیلیب و عملیاتلرینی توختهتیش گه بویروغ بیردی.
افغانستان حکومت و طالبان تامانیدن اعلان قیلینگن اوچ کونلیک آتیشکیسین آمریکا، ناتو، کانادا و دنیانینگ باشقه بیرقطار مملکتلری تامانیدن خوش قرشیلندی.
عین حالده، ملی خوفسیزلیک کینگشی نینگ اعلان قیلیشیچه، افغانستان حکومتی تینچلیک جریانیده مؤفقیت قولگه کیریتیش، آتیشکیسین دوام ایتیشی و افغانستانلیکلر ارا سوزلشوولر تیزلیککه باشلهنیشی اوچون طالبان نینگ محبوسلریدن کمیده 900 تهسینی قوییب یوبارهدی.
