معلوم که انترنت سونگی ییل‌لرده انسان حیاتیده اینگ کته انقلاب و اوزگریشلرگه سبب بولگن نرسه سنه‌له‌دی. کیینگی ییل‌لرده دنیا بویلب انترنت‌دن فایده‌لنیش کولمی مثلی کوریلمه‌گن درجه‌ده آشیب بارماقده. انترنت‌نی دنیا‌‌نی کیچکینه بیر قیشلاققه ایلنتیریب قویگنی حقیده ایتیلگن فکرده جان بار، البته. حاضرگی کونده انترنت ترماقلری ییر کره‌‌سینی اوره‌ب آلگن. دنیانینگ هیچ بیر نقطه‌سیده انترنت ایشلمه‌یدگن ییر بولمسه کیره‌ک.
افغانستان‌ده هم سونگی اون ییل ایچی‌ده موبایل تیلفون‌لر ترماقلری و نورلی فایبر فعالیت‌گه باشلشی بیلن انترنت‌دن فایده‌لنیش امکان‌لری مهیا ایتلدی.
کیینگی ییل‌لرده افغانستان بویلب انترنت‌نینگ اجتماعی ترماقلری اینیقسه فیسبوک، تویتر، سکای‌پی، وای فای، یوتیوب و باشقه ترماقلردن فایده‌لنووچیلر سانی آشیب بارماقده. بو آره‌ده فیسبوک مشتری‌لری برچه ترماقلردن کوپ دیسک خطا قیلمه‌یمیز.
جمله‌دن یاشلر آره‌سیده فیس‌بوک‌نی قول له‌یدگنلر اوته کوپ. باشقه بیر تاماندن انترنت دنیا بویلب گلوباللشو جریانی‌نی تیزلشتیریش‌ده کته رول اوینه ماقده. افغانستان‌لیک اوزبیک‌لر آره‌سیده هم انترنت‌دن فایده‌لنیش میزانی آشگنی کوزه‌تیله‌دی.
فیسبوک ترماغی
اوزبیک یاشلر افغانستان بویلب انترنت ترماقلریدن فیس‌بوک‌نینگ اساسی شریکلری حسابلنه‌دیلر. انترنت‌گه باغلنیش امکانیگه ایگه بولگن هر بیر اوزبیک یاش‌نینگ فیسبوک ترماغی‌ده صحیفه آچمس‌دن علاجی یوق.
حتا که سوادی بولمه‌گنلر هم فیس‌بوک‌دن فایده‌لنیش‌گه قیزیقه دیلر. مادامی که مملکت اوزبیکلری اینیقسه یاشلر آره‌سیده انترنت ترماقلری اینیقسه فیس‌بوک‌دن فایده‌لنیش رواجلنگن ایکن، اولرنی انترنت‌دن قنده‌ی فایده‌لنه یاتگن لیک‌لری باره‌سیده‌گی سوال اوز اوزیدن توغیلیشی ممکن. بو جدی مساله.
بیرینچی‌دن فیسبوک صحیفه‌سی مملکت اوزبیکلری آره‌سیده آنلاین میدیا رولی‌نی اوینه ماقده. مملکت نینگ هر بیر نقطه‌سیده یوز بیره‌دیگن هر قنده‌ی واقعه و حادثه‌دن فیسبوک شریکلری اوشه آن نینگ اوزیده خبردار بولیب توره‌دیلر.
در واقع فیس بوککه شریک بولگن اوزبیک‌لریمیز فیس‌بوکچیلر (فیسبوک ده‌گی دوستلری) نی محلی خبرچی اوله‌راق اوز اطرافلریده عمل‌گه آشه‌دیگن حادثه‌لردن باخبر قیلیب توره‌دیلر. عین حالده مملکت وضعیتی، سیاسی، اقتصادی و اجتماعی حیات حقیده اوزبیک‌لر تامانیدن فیسبوک آرقه‌لی فکر بیلدیریش، شرح و تحلیل یازیش حاللری هم کوزه‌تیله‌دی.
شونینگ‌دیک فیسبوک خوانلر بیر قطار یازووچی‌لر و قلمکش‌لر تامانیدن اوزبیک‌لرنینگ اوتمیشی، فرهنگی حیاتی باره‌سیده نشر ایتیله دیگن معلومات‌لر و مقاله‌لرنی اوقیب اوز اوتمیشلریدن خبردار بولیش‌لری هم اهمیت‌گه مالک حرکت سنه‌له‌دی.
اوشبو ترماق آرقه‌لی اوزبیک‌لر حیاتیگه تیگیشلی قیسقه فلم‌لر، اوزبیک قوشیقچی‌لر اشوله‌لری یایینله‌نیب، توره‌دی. اوزبیک کلاسیک همده زمانوی شعریتی نماینده‌لری، اثرلری، نمونه‌لری نشر ایتیله‌دی. بولر همه‌سی درواقع انترنت‌دن فایده لنووچی مملکت اوزبیکلری اینیقسه یاشلری‌میز آنگینی صیقل‌لشگه، اولرنینگ معلوماتی‌نی آشیریش اوچون علیحده اهمیت کسب ایته‌دی.
بو آره‌ده فیس‌بوکچی اوزبیک‌لر تامانیدن اوز آنه تیل‌لریده یازه یاتگن‌لیک‌لری کوپراق کوزه‌تیله‌دی. بو نرسه‌نینگ اوزی حاضرگی شرایط‌ده دقت‌گه سزاوار و مهم مساله حسابلنه‌دی. در واقع فیسبوک افغانستان‌لیک اوزبیک یاشلرنینگ اوزبیک تیلی بوییچه سوادلرینی آشیریش اوچون یخشی و قولی بیر مشق تخته‌سی گه ایلنیب بارماقده.
انترنت ترماقلریدن ایش آلیش معیارلی می؟
افغانستان اوزبیک‌لرینی انترنت ترماقلریدن فایده‌لنیش درجه سی‌نی هلی منطقه دولت‌لری بیلن تقاسلب بولمه‌یدی. نیگه دیگنده بیرینچی‌دن انترنت‌دن فایده‌لنیش‌ده باشقه مملکت‌لر افغانستان‌گه نسبتن بیر آز آلدین باشله‌گن بولسه‌لر – ده، اولر آره‌سیده سواد درجه‌سی بلندلیگی همده انگلیس تیلی‌نی بیلیش هم اوزیگه خاص اهمیت‌گه ایگه.
افسوس‌که افغانستان بویلب بیزنینگ اوزبیک‌لریمیز (بیر قطار شخص‌لر استثنا) تورلی ساحه‌لرده انترنت‌گه بیریله‌دیگن معلومات‌لردن فایده‌لنیش قابلیتی‌گه ایگه ایمس‌لر.
در حقیقت بیز علمی‌میزنی آشیریش همده اکادمیک ساحه‌سیده انترنت امکان‌لریدن استفاده قیله آلمه‌گن‌میز. کوپچی‌لیک یاشلری‌میز انترنت دیگنده فقط فیس‌بوک‌نی و فیسبوک دیگنده فقط سلفی (سونگی آله‌دیگن) رسم‌لرینی مبایل تیلفون‌لری‌گه توشیریب فیسبوک صحیفه‌سیگه قوییش‌دن نریگه اوته آلمه‌گنلر. یاشلری‌میزنی بو مساله اوچون بی‌فرق قالمس‌لیک لری لازم.
افغانستان‌ده انترنت خذمت‌لری نرخی نینگ بلندلیگی
همه هم حاضرگی آغیر اقتصادی شرایط‌ده چیکسیز روش‌ده انترنت‌دن فایده‌لنیش امکانیگه ایگه ایمس. حاضرگی کونده افغانستان‌ده انترنت ترماقلری اینیقسه فیسبوک سایتی‌دن اوزبیک یاش‌لری‌نینگ اوزبیکچه سوادلرینی آشیریش اوچون قولی بیر شکل‌ده فایده‌لنیش ممکن.
یاشلری‌میزنینگ اکثریتی‌نی اوزبیکستان سایت‌لریده نشر ایتیلگن موضوع‌لرنی اوقیشلری قیین بولگنی اوچون اولر مذکور سایت‌لردن کمدن کم فایده‌لنه‌دیلر. چونکه اوزبیکستان سایت‌لری‌ده‌گی مقاله و موضوع‌لر لاتین الفباسی و یا هم کیریل الفباسی‌ده ترقه‌تیله‌دی.
بو آره‌ده، افغانستان‌ده فعالیت آلیب باره‌دیگن سناقلی اوزبیک تیلشناسلر، اوزبیک تیلی و ادبیاتی استادلری برابریده کونده‌لنگ تورگن کته بیر مسؤولیت هم کوز اونگیمیزده گوده‌لنه‌دی. او هم بولسه انترنت سایت‌لری آرقه‌لی یاش اوزبیک‌لرگه اوز آنه تیل‌لریده اوقیب یازیش نی توغری اورگه‌تیش.
استادلری‌میز، انترنت سایت‌لری جمله‌دن فیسبوک صحیفه‌لری آرقه‌لی تورلی موضوع‌لرگه تیگیشلی مهم و علمی مقاله‌لرنی ترقه‌تیب توریشلری‌گه احتیاج سیزیله‌دی. گرچه؛ بیر قطار استادلر اله-قچان بو اساسی وظیفه‌نی بجریب کیلماقده‌لر. یاشلری‌میزنی هم تنیقلی استادلر یازه‌دیگن مقاله‌لر و موضوع‌لرنی دقت بیلن ایرینمس‌دن اوقیب باریشلری لازم.
عکس حالده بیر قول بیلن قرسک چه‌لیب بولمه‌یدی. حاضرگی کونده انترنت، بیزنینگ یاشلری‌میز حیاتی اوچون کته اهمیت کسب ایتماقده. در واقع بوکون نینگ اوزیده یاشلر حیاتی‌نی انترنت‌سیز تصور ایتیب بولمه‌یدی. مادامی که شونده‌ی ایکن یاشلری‌میزنی انترنت‌دن توغری و یخشی فایده‌له‌نیشلری مقصدگه موافق بوله‌دی.
