پیک تدقیقاتی خبرچیلیک مرکزی
خبرچی: نثاراحمد خلوتگر
افغانستان حکومتی، مملکت نافذه قانونلریگه قرشی افغانستان ایشلاوچی‌لرینی ملی اویوشمه‌سی‌نینگ جایدادلرینی غصب قیلگن.
اوشبو گزارش گه دخیل منبع و پیک تدقیقاتی خبرچیلیک مرکزی‌نینگ یوزمه یوز سوزلشوولری و کنکاش آرقه‌لی قولگه کیریتیلگن حجت‌لر و مدرک‌لر اساسیده، امکانینگ بوتون جایدادلری قانونی حجت و شرعی قباله گه ایگه بولگن و حکومت مسؤوللریدن بیرقطاری، اساسی قانون نینگ 64- ماده‌سی، جمعیت‌لر قانونی نینگ 13- ماده‌سی، افغانستان جزایی اجراآت قانونی 34- ماده‌سی و بوتون حجت، شرعی و قانونی قباله گه قرشی امکا جایدادلرینی مُهرلاک قیلگن.
امکا باشلیغی معروف قادری نینگ ایتیشیچه، جمهورلیک ریاستی، مالیه و عدلیه وزیرلیک‌لری و مملکت باش محکمه‌سی و بو اداره‌لرنینگ مسؤوللریدن هر بیری، جمهور رئیس نینگ فرمانینی مذکور اداره‌نینگ قولیده‌گی شرعی قباله‌سی و حجت‌لریگه ترجیح بیریب و اولرنینگ هرقنده‌ی دادخواهلیک‌لری و اعتراضلری برابریده بونده‌ی دیگن:
«جمهور رئیس نینگ فرمانی دیر.»
افغانستان حقوقدانلر انجمنی هم بو فرماننی ناقانونی بیلیب و قانون حکمی، شرعی و قانونی قباله اعتبارینی جمهور رئیس نینگ فرمانی و شفاهی امریدن اوستون دیگن.
امکا دوسیه‌سی و تأریخچه‌سی
امکا یا-ده افغانستان ایشلاوچی‌لری‌نینگ ملی بیرلیگی، قویاش 1343- ییل‌ده اجتماعی بیر اداره، دولتی و غیردولتی اداره‌لرنینگ ملازملری و ایشلاوچی‌لرنی بسیج قیلووچی بیر مرکز صفتیده ایجاد ایتیلیب و افغانستان عدلیه وزیرلیگی‌ده رویخط‌گه آلینگن و اساسی قانون نینگ 35- ماده‌سی، اجتماعی تشکیلاتلر قانونی نینگ 7- ماده‌سی و خلق ارا کنوانسیونی و ایش قانونی نینگ 27- ماده‌سی اساسیده فعالیت قیله‌دی.
ایچکی ایشلر وزیرلیگی تامانیدن تعیین ایتیلگن هیأت تیکشیروویده تیارلگن گزارش کاپیسی و شرعی قباله شامل قولگه کیریتیلگن حجت و مدرک گه کوره، کابل، پروان، کاپیسا، پنجشیر، بدخشان، تخار، بغلان، سمنگان، جوزجان، وردگ، هلمند، فراه و نیمروز ولایت‌لریده امکا اداره‌سیگه تیگیشلی 17 جایداد (ییر، حویلی، دوکان و بنا) نینگ هر بیری مذکور بیرلشمه اعضالرینی حق‌العضویت پولیدن ساتیب آلینگن و بولرنینگ برچه‌سی شرعی قباله گه ایگه دیر.
اوشبو جایدادلرنینگ ساتیب آلینگن زمانیده چمه‌سی 100 میلیون افغانی ارزشی بولگن و حاضر حکومت تامانیدن مُهرولاک قیلینیب و مذکور اداره‌نینگ نظارتیدن چیقاریلگن.
افغانستان ایشلاوچی‌لری‌نینگ ملی بیرلیگی یا-ده امکا باشلیغی معروف قادری، حکومت نی شخصی جایدادلرنی غصب قیلیش گه عیب‌لب و پیک خبرچیسی گه ایتیشیچه:
«بیزلرنینگ جایدادلریمیز غصب قیلینیش موضوعی بیرلشمه سیلاوی یعنی می‌نینگ باشلیغ بولگنیم و رقیبیم ناکام بولگنی گه باغلیق بوله‌دی.»
امکا، قنده‌ی کابینه سوژه‌سی بولدی؟
امکانینگ رسمی انترنتی صحیفه‌سیده نشر قیلینگن مذکور اداره‌نینگ اساس‌نامه‌سینی 14- ماده‌سیده کیلیشیچه: «اویوشمه نینگ باشلیغی و ایکی اورین باسری‌نینگ تنلش و ایش‌دن آلیش اویوشمه اعضالری‌نینگ کوپینچه آوازی بیلن عمل‌گه آشیریله‌دی.»
بیراق، امکا باشلیغی جناب قادری گه کوره، اوتگن ییل مذکور اویوشمه باشلیغلیگی اوچون اوتکزیلگن سیلاوده عبدالستار پردلی اونینگ برابریده یوتوققه ایریشه آلمه‌گنی سبب، بو ریاست گه ایریشیش اوچون زوری و حکومتی علاقه‌سیدن فایده‌لنگن. ینه هم مقصدگه ایریشه آلمه‌گنی باعث، بو اداره نی اورته‌دن آلیب کیتیش خصوصیده باشقه ریجه تیارلگن. جناب قادری، مشخص شکلده کیم‌سه دن آت توتمه‌یدی؛ بیراق جمهور رئیس گه یقین کیشی‌لر و مصلحتچی‌لرگه اشاره قیلیب کوپه‌یتیریشیچه، جناب پُردلی سیاسی و قومی علاقه‌لریدن فایده‌لنیب و حکومت بلندمرتبه‌لی رسمی‌لری‌نینگ بیرقطاری بیلن بیرگه اویوشمه جایدادلرینی دولتی قیلیش تکلیفی‌نی حکومت کابینه‌سیگه ییتکیزگن و نتیجه‌ده کابینه قراری و جمهور رئیس نینگ فرمانی اساسیده، پُردلی نینگ ریجه‌سی عمل‌گه آشیریلگن.
پیک خبرچیسی گه صحبت بیرگن عبدالستار پُردلی هم امکا جایدادلری دولتی‌لشتیریلیش ریجه‌سی اونینگ تامانیدن حکومت کابینه‌سیگه تکلیف قیلینگنینی تصدیقلیدی. او هم کیم‌سه دن آت توتمه‌یدی؛ بیراق ایتیشیچه، بو ریجه‌نی کابینه سوژه‌سی بولیشی اوچون جمهور رئیس نینگ مصلحتچی‌لریدن بیریگه تاپشیرگن.
جناب پُردلی نینگ کوپه‌یتیریشیچه: «مین اویوشمه باشلیغی بولگنیم ده، اویوشمه نینگ بوتون جایدادلرینی حکومت دن قیتریب آله‌من.»
جمهور رئیس نینگ فرمانی
قویاش 1396-11-30 تأریخی‌ده جمهورلیک ریاستی تامانیدن صادر ایتیلگن «57» رقم‌لی فرمان اساسیده، یاشلر اویوشمه‌سی، یازووچیلر اویوشمه‌سی، ایکینچی‌لر کوپراتیفی و ایشلاوچیلر ملی اویوشمه‌سیگه تیگیشلی بوتون جایدادلر «دولتی ملکیت» دییلگن و بو جایدادلر مالیه وزیرلیگی گه تاپشیریلیشی خصوصیده بویروغ بیریلگن.
اوشبو فرمان صادر ایتیلگنیدن بیر آی اوتگنیدن سونگ، مذکور جایدادلر تیکشیریلیشی اوچون جمهورلیک ریاستی ایچکی ایشلر وزیرلیگی دن بیر هیأت تعیین قیلگن؛ بیراق تیکشیروولر یکونلنمه‌سیدن آلدین، بوتون جایدادلر مالیه وزیرلیگی تامانیدن مُهرولاک قیلینگن.
اجتماعی تشکیلاتلر و اویوشمه‌لرنینگ جایدادلرینی تیکشیریش گزارشی جایداد موقعیتی، مساحتی، قیمتی، شرطنامه‌سی و شرعی قباله نینگ بیر کاپیسی بو گزارش‌ده کیریتیلگن و اونینگ اصلیسی ایچکی ایشلر وزیرلیگی تامانیدن جمهورلیک ریاستی گه ارایه ایتیلگن؛ مذکور حجت‌لرگه کوره، امکاگه تیگیشلی جایدادلرنی برچه‌سی شرعی قباله گه ایگه بولگن و باشقه تشکیلاتلرگه تیگیشلی قالگن برچه جایدادلر دولتی دییلگن.
جمهور رئیس نینگ شفاهی امری گه وقتینچه‌لیک جواز صادر ایتیلگن
قانون اساسیده، غیردولتی مؤسسه‌لر، اداره‌لر، شرکت‌لر و کیشی‌لر اوچون رسمی فعالیت جوازی مملکت عدلیه وزیرلیگی تامانیدن صادر ایتیلیب یا-ده هر اوچ ییل‌ده قیته تیکلنه‌دی؛ بیراق امکا جایدادلریگه تیگیشلی دوسیه باسقیچ‌دن اوتکزیلیشی باعث، عدلیه وزیرلیگی بو تشکیلات گه آلتی آیلیک بولگن وقتینچه‌لیک جواز صادر قیلگن.
مملکت جمعیت‌لریگه خاص قانون نینگ 13- ماده‌سینی اوچینچی بندی ده کیلیشیچه، جمعیت‌لرگه خاص فعالیت جوازی 3 ییل‌گچه عدلیه وزیرلیگی تامانیدن 10 مینگ افغانی برابریده صادر ایتیله‌دی و اوچ ییل‌دن سونگ تمدید بوله‌دی.
بیراق، امکا باشلیغی نینگ ایتیشیچه: «جوازنی تمدید قیلیش اوچون مراجعه قیلگن چاغیمیزده تمدید قیلمه‌دیلر و حکومت بیلن اویوشمه‌نینگ حقوقی دوسیه‌سینی باسقیچ‌دن اوتکزیش خصوصیده، آلتی آی اوچون وقتینچه‌لیک جواز بیردیلر.»
عین حالده، قولگه کیریتیلگن حجت گه کوره، ایش و اجتماعی ایشلر وزیرلیگی هم رسمی بیر تکلیف‌نامه آرقه‌لی جمهورلیک ریاستی دن امکا اداره‌سی نینگ جوازی تمدید قیلینیشی نی سوره‌گن و تکلیف‌نامه متنی هم جمهور رئیس تامانیدن تصدیقلنیب و امضاء قیلینگن. بیراق عدلیه وزیرلیگی تکلیف‌نامه متنی، تصدیقلنگنی و شونینگدیک، جمعیت‌لرگه خاص قانونی‌نینگ 13-ماده‌سی گه قرشی آلتی آیلیک وقتینچه جواز صادر قیلگن.
عدلیه وزیرلیگی نینگ جمعیت‌لر و حزب‌لرنی رویخط‌گه آلووچی و منسجم‌لشتیرووچی اداره‌سینی باشلیغی سید عبدالقادر غیاثی نینگ پیک خبرچیسی گه ایتیشیچه: «جمهور رئیس نینگ شفاهی بویروغی دیر و حکومت بیلن امکانینگ حسابی نهایی بولگونگه‌قدر وقتینچه‌لیک جواز بیریلگن.»
پیک خبرچیسی، جمهور رئیس نینگ شفاهی بویروغیدن مقصد نیمه‌لیگینی بیلیش اوچون نیچه مرته سوزلاوچیلری بیلن علاقه قورگن؛ بیراق جمهورلیک ریاستی سوزلاوچیسینی اورین باسری شاه‌حسین مرتضوی، سونگی تلیفونی علاقه‌ده ایتیشیچه، بو قرار مالیه وزیرلیگی تامانیدن آلینگن؛ بیراق مشخص شکلده جمهور رئیس نینگ شفاهی بویروغی توغریسیده ایتیشیچه:
«می‌نینگ خبریم یوق، عدلیه وزیرلیگی هرنرسه دیسه، اونی نقل قول قیلینگ.»
کیم غلبه قازانه‌دی؟
شونینگدیک، مملکت مالیه وزیرلیگی امکا و اجتماعی تشکیلاتلرنینگ جایدادلری دولتی‌لشتیریلیشی خصوصیده، جمهور رئیس نینگ فرمانینی عمل گه آشیریش صفتیده، مسؤولیت یوکینی محکمه اوستیگه قویه‌دی.
مالیه وزیرلیگینی سوزلاوچیسی شمع‌روزخان مسجدی نینگ ایتیشیچه: «امکا جایدادلری سوداگرلیک محکمه نینگ حکمی اساسیده بوشه‌تیلیب و مُهرولاک قیلینگن.»
شونینگدیک، باش محکمه سوزلاوچیسی امان‌الله ایمان، 1395-06-10 تأریخی ده حکومت کابینه‌سی نینگ 12- رقم‌لی مصوبه‌سی و 1396-02-18 تأریخی ده جمهور رئیس نینگ 640- رقم‌لی حکمی اساسیده، محکمه‌نینگ دستلبکی قراریدن خبر بیریب پیک خبرچیسی گه ایتیشیچه: «محکمه حجت و مدرک اساسیده قرار قیلگن و قانیقمه‌گن صورتده، ایکینچی و اوچینچی محکمه گه مراجعه قیله آله‌دی.»
عین حالده، افغانستان بوییچه حقوقدانلر انجمنی نینگ اعضاسی عبدالوحید فرزه‌ای گه کوره، هیچ قنده‌ی فرمان، مصوبه و شفاهی بویروغ قانون، قانونی حجت و قانونی قباله دن اوستون بوله آلمه‌یدی.
«افغانستان اساسی قانونی، شخصی ملکیت نی تعرض دن تشقری دیگن و هر بیر کیشی یا-ده اداره نینگ قانونی حجتی و شرعی قباله‌سی بولگنده، کیم‌سه یا-ده اداره، اونینگ شخصی ملکیتینی قولیدن آله آلمه‌یدی.»
