طالب‌لر اوتکن کون توشدن سونگ بغلان ولایتی بُرکه تومنی اوستیگه هجوم اویوشتیرگن، ایتیلیشیچه، امنیتی کوچلر بیلن طالب‌لر اورته‌سیده حاضرگچه توقنه‌شوو دوام ایتماقده.
بغلان امنیه قومندانی عبدالجبار پردلی‌نینگ ایتیشیچه، جندالله بیلن طالب‌لر گروهی قندوزده شکست ییگنیدن کیین، بُرکه تومنی‌گه کیلیب، مذکور تومن‌نی نظارت‌گه آلیش خصوصیده سعی و حرکت قیلگن. جناب پردلی‌نینگ کوپه‌یتیریشیچه، اوشبو توقنه‌شوولر جریانیده حاضرگچه 13 طالب هلاک بولگن و شونینگ‌دیک امنیتی کوچلردن 3 ته‌سی یره‌لنگن.
شونینگ‌دیک بغلان ولایتی کینگشی اورین باسری فیروزالدین ایماق‌نینگ آگاه‌لنتیریشیچه، اوشبو تومن‌گه کوپراق امنیتی کوچ یوباریلمه‌گن صورتده، تیزلیک‌ده مذکور تومن طالب‌لر نظارتی‌گه اوته‌دی.
طالب‌لر حاضرگچه بو توغریده هیچ نرسه دیمه‌گن.
لوگرده اونلرچه طالب هلاک بولگن
لوگر محلی رسمی‌لری، مذکور ولایت‌ده 110 دن آرتیق طالب هلاک بولگنی‌دن خبر بیره‌دی. لوگر والیسی سوزلاوچیسی سلیم صالح‌نینگ ایتیشیچه، مذکور ولایت خروار تومنی‌ده بیر هفته‌دن بویان امنیتی کوچلر تامانیدن یولگه قوییلگن تازه‌لش عملیات جریانیده، قورال‌لی طالب‌لرگه آغیر تلفات ییتکیزیلگن.
جناب صالح‌گه کوره، هلاک بولگن‌لر ایچیده طالب‌لرنینگ آلتی قومندانی هم موجود بولگن. اونگه کوره، اوشبو عملیات دوام ایتکن صورتده، خروار تومنی بوتونله‌ی قورال‌لی طالب لردن تازه‌لنیشی ممکن. لوگر والیسی سوزلاوچیسی‌نینگ کوپه‌یتیریشیچه، اوتکن 14 ییل‌ده مذکور تومن‌نی بیر قسمی طالبان نظارتی‌گه ایکن.
شونینگ‌دیک لوگر ولایت کینگشی باشلیغی حسیب‌الله ستانکزی، اوشبو عملیات‌نی ایجابی دیب بیله‌دی، بیراق امنیتی کوچلردن عملیات‌لری یکونلگنی‌دن کیین، امنیت یخشی‌لنیشی خصوصیده، مذکور تومن‌ده حضور تاپیش‌لرینی سوره‌دی.
عین حالده، طالب‌لرنینگ سوزلاوچیلریدن بیری ذبیح‌الله مجاهد، اوشبو عملیات نتیجه‌سیده، مذکور گروه‌نینگ 5 اعضاسی هلاک بولگن دییدی. او، حکومت رسمی‌لری تامانیدن بولگن ادعالرنی رد ایتدی.
اونگه کوره، اوتکن 14 ییل جریانیده، مذکور منطقه‌نی یالغیز پولیس قومندانلیگی و تومن بناسی حکومت قولی‌ده بولگن و باشقه منطقه‌لری اولرنینگ نظارتی‌ده ایکن.
