د برازیل په کوربتوب د ۲۰۱۶ م کال (ریو) المپيک سیالیو کې امریکا د خپلو سیالانو چین او جاپان پر وړاندې ډېره وړاندې شوه.
د سیالیو د رسمي وېبپاڼې د معلوماتو له مخې، د روانو سیالیو په دویمه ورځ لوبو کې امریکایي لوبغاړیو ښې لوبې وکړې او د مډالونو شمېر یې ۱۲ ته ورسولو.
که څه هم امریکا په ۱۲ مډالونو سره مخکښ هېواد دی؛ خو جاپان بیا په ۷ ګټلو مډالونو کې ۶ د سرو زرو مډالونه ګټلي، چې له نورو هېوادونو زیات دي.
د امریکا له پاره مشهور لامبو وهونکي مایکل فیلپس خپل ټول سیالان شا ته پرېښودل او د سرو زرو ۱۹م مډال یې ترلاسه کړ.
مایکل فیلیپس اوسمهال ۳۱ کاله عمر لري، چې ۵ ځلې د المپیک په سترو سیالیو کې د امریکا په استازیتوب لوبېدلی دی او د لوبو په تاریخ کې یوازینی لوبغاړی دی، چې په ټولو لامبو وهونکیو کې یې زیات (۱۹) د سرو زرو مډالونه ګټلي دي.
فیلیپس په ټولټال ۲۳ ګټل شویو مډالونو کې تراوسه ۱۹ د سرو زرو ، ۲ د سپینو زرو او ۲ بیا د زېړو یا (برونزو) مډالونه ګټلي دي.
دغه راز د انګلستان هېواد له پاره لومړی لوبغاړی لامبو وهونکی ایډم پیټي و، چې خپل هېواد ته یې د (ریو) المپیک سیالیو لومړی د سرو زرو مډال وګټلو.
همدارنګه د کوسووا هېواد له پاره چې لوبغاړي یې د لومړي ځل له پاره په المپیک سیالیو کې لوبېږي ۲۵ کلنې ښځینه لوبغاړې میجلنډا کیلمنډي په ۵۲ کیلو ګرامه وزن کې په جودو ورزش کې لومړی د سرو زرو تاریخي مډال ترلاسه کړ.
د المپیک په روانو سیالیو کې مشهور او لومړی مقام لرونکی ټینس لوبغاړی سربیایي نواک جاکویک او امریکایۍ ښځینه ټینس لوبغاړې وینس ویلیمز په ژړا سره رخصت شول، چې د ماتو په خوړلو سره یې په روانو المپیک سیالیو کې خپلو هېوادونو ته مډال ګټلو کې پاتې راغلل.
دغه راز په روانو سیالیو کې د کوربه هېواد برازیل فوټبال ملي لوبډله له عراق سره د لومړۍ سیالۍ برابرولو وروسته لا هم د لومړۍ بریا په تمه ده؛ خو د جرمني او سویلي کوریا ترمنځ سیالۍ هم ۳ ـ ۳ ګولونو سره برابره پای ته رسېدلې ده.
د دویمې ورځې تر پایه امریکا په ۱۲ مډالونو لومړی، چین په ۸ مډالونو سره دویم؛ خو اسټرالیا بیا پر ۶ مډالونو سره درېیم مقام ګټلی دی.
