د افغانستان کرېکټ ملي لوبډلې چې له پخواني مالي ملاتړ کوونکي (الکوزي) شرکت سره یی د تړون تر لغوه کېدو وروسته مالي ملاتړ نه درلود، اوس د «امول» په نوم له یوه هندي شرکت سره ملګرې شوه.
د افغانستان کرېکټ بورډ او امول شرکت ترمنځ د «سپانسر» تړون نن په هندوستان کې د کرېکټ بورډ اجرایوي رییس او د یاد هندي شرکت د مسوولانو ترمنځ لاسلیک شو.
که څه هم د تړون له مخې، ترلاسه کېدونکیو پیسو په اړه کرېکټ بورډ څه نهدي ویلي، خو ویل کېږي چې دغه شرکت به د ملي لوبډلې په لباس د خپلې لوګو د لګولو په بدل کې افغان کرېکټ بورډ ته ۱۵۰۰۰۰ زره امریکایي ډالره ورکړي.
د یادونې وړ ده چې د تړون دلاسلیکېدو پرمهال د افغانستان کرېکټ بورډ اجرایوي رییس اسدالله خان، د غوراوي کمېټې رییس دولت احمدزی او یو لوبغاړی مجیب ځدران موجود وو، خو د کرېکټ بورډ لهخوا د پخوانیو نورو تړونونو په څېر له دغه تړون نه هم د کرېکټ بورډ د رسنیو او بازارموندنې د څانګې مسوولان لرې پاتې شوي وو.
د Amul شرکت مسوول روي جېت سودي د تړون په مراسمو کې وویل، امول په هندوستان کې د لبنیاتو تر ټولو ستر شرکت دی چې د هندوستان او نورو هېوادونو په څېر به یې افغانستان هم د خپلو تولیداتو د خرڅلاو مرکز شي.
اړوند مطالب:
نړۍوال جام ته افغان لوبډله اعلان شوه
سریلانکا د افغانستان کرېکټ سره مرسته کوي
د نوموړي په وینا، افغان کرېکټ ملي لوبډلې په ډېر کم وخت کې ښې لاستهراوړنی لرلي او د کرېکټ نړۍ ته یې د نبي عیسیخېل، مجیب ځدران او راشدخان په څېر لوبغاړي وړاندې کړي دي.
د روي جېت سودي په وینا، د مالي ملاتړ کوونکي یا سپانسر په توګه Amul شرکت هیله لري چې افغان کرېکټ ملي لوبډله به په نړېوال جام کې د نورو ګډون کوونکیو لوبډلو په وړاندې تر ټولو ښې لوبې وکړي.
د نوموړي په وینا، د افغانستان او امول تړون د څو لسیزو پخوانی دی چی په ۱۹۶۹ کال کې خان عبدالغفارخان په هند کې له Amul شرکت نه لیدنه کړې وه.
دغه راز د کرېکټ بورډ اجرایوي رییس اسدالله خان بیا په خپلو خبرو کې د تړون په اړه څه ونه ویل، خو د افغانستان په بیارغونه، د افغانستان کرېکټ ملي لوبډلې ته د سپانسر موقع ورکولو او د افغانستان له کرېکټ سره یی د مرستو له کبله د هندوستان حکومت، امول شرکت، هندي کرېکټ بورډ، په کابل کې د هندوستان سفارت او دغه راز له افغانانو سره د مینې له کبله له ټول هندوستان نه مننه وکړه.
د یادونې وړ ده چې د افغانستان الکوزي شرکت په ۲۰۱۵ کال کې له افغان کرېکټ بورډ سره ۱۰ کلن تړون لاسلیک کړ، خو بیا یې د ۵ کلونو له تېرېدو وروسته روان کال له کوم ښکاره دلیل پرته پای ته ورساوه.
بلهخوا افغان کرېکټ بورډ ویلي، افغانستان اوس بشپړ غړیتوب لري او باید د الکوزي شرکت د کال ۱۳ لکه امریکایي ډالرو پرځای، ډېرې پیسې پیدا کړي؛ نو ځکه یې له الکوزي شرکت سره تړون پای ته ورسېد.
