د بنګله دیش خلاف د ۵۰ اوریزه کرکټ سیالیو د اتلولۍ جام بایللو سره سره د افغانستان کرکټ ملي لوبډلې په نړیواله درجه بندۍ کې نور امتیازونه هم ترلاسه کړل.
د کرکټ نړیوالې شورا د رسمي ویبپاڼې د راپورله مخې، د کوربه لوبډلې خلاف په دویمې بریا سره افغانستان ۴ نور امتیازونه ترلاسه کړل او خپل ۱۰ م مقام یې نور هم پوخ کړ.
په ۴ امتیازونو ګټلو سره افغانستان له ۱۱ م مقام لرونکې ټیسټ لوبډلې زمبابوې څخه اوسمهال ۶ امتیازونه وړاندې دی، چې ۵۲ پواینټونه لري.
دغه راز بنګله دیش بیا د افغانستان خلاف ۲ د ۱ بریا په وړاندې د ۵۰ اوریزه لوبو د اتلولۍ جام ګټلو سره سره، خو په دویمې ماتې سره ۳ مهم امتیازونه له لاسه ورکړل.
کوربه بنګله دیشۍ کرکټ ملي لوبډلې په پریکړه کوونکې درېیمه ۵۰ اوریزه لوبه کې افغان کرکټ ملي لوبډلې ته د یوې یو اړخیزې لوبې وروسته په ستر ۱۴۱ منډو توپیرسره ماتې ورکړه او په خپل کوربتوب یې سر په سر د اتلولۍ ۵ م جام هم وګاټه.
د امتیازونو په بایللو سره دانګلستان په کوربتوب ۲۰۱۹ کال ۵۰ اوریزه کرکټ نړیوال جام سیالیو ته د بنګله دیش په رسیدو کې د ویسټ انډيز او پاکستان په بریاوو سره خنډ راتلای شي.
دا چې بنګله دیش ۳ امتیازونه له لاسه ورکړل، نو نهم مقام لرونکې پاکستانۍ کرکټ ملي لوبډلې سره یې د امتیازونو توپیر له ۱۱ نه ۸ ته راښکته شو، چې بنګله دیش ته د خطرزنګ دی.
پاکستانۍ کرکټ ملي لوبډله بیا ویسټ انډيز سره په سیالیو بوخته ده چې ۳ د صفر بریا په وړاندې کولای شي دغه توپیر ۶ امتیازونو ته راښکته کړي، چې نه یواځې له ویسټ انډيز څخه مخکی کیږي ترڅنګ به یې د بنګله دیش سرخوږی نور هم زیات کړي.
بنګله دیشۍ کرکټ ملي لوبډلې بیا افغانستان ته په ماتې ورکولو سره په خپل کورکی سر په سر۶ م د اتلولۍ جام وګاټه او د دوی راتلونکې سیالۍ په خپل کوربتوب انګلستان دی.
که بنګله دیش انګلستان ته هم په خپل کوربتوب سیریز کې په ماتې ورکولو بریالی شي، نو له سریلانکا څخه به اوسنې ۶ م مقام ونیسي.
د یادونې وړ ده، چې د کرکټ نړیوالې شورا په اوسنۍ وروستۍ ۵۰ اوریزه لوبو درجه بندۍ کې اسټرالیا لومړی، خو افغانستان بیا له ټیسټ لوبډلې زمبابوې وړاندې ۱۰ م مقام له ځان سره لري.
