ویل کیږي، چې په ۲۰۱۵ م کال کرکټ نړېوال جام سیالیو کې د لوبېدو وروسته به د افغانستان کرکټ ملي لوبډلې د کپټان محمد نبي عیسی خېل په ګډون ټول افغان ملي کرکټ لوبغاړي ډېر ژر به په کابل کې په (میلیون لیګ) شل اوریزه کرکټ سیالیو کې ولوبېږي.
د کرکټ ادارې له خوا په دغه ټورنمنټ کې به محمد نبي عیسی خیل، نوروزمنګل، حمید حسن، ميرویس اشرف، کریم صادق او ناصرجمال احمدزی د لوبډلو کپتاني په غاړه ولري.
د دې سیالیو مسوولین وایي، چې درېیم پړاو (ميلیون لیګ) ۲۰ اوریزه کرکټ سیالۍ به د تېرو پړاونو په پرتله د ملي کرکټرانو په شتون کې په ځانګړو نوښتونو سره ترسره شي.
د دې ادارې چارواکي زیاتوي، چې سیالۍ د افغانستان کرکټ بورډ په همکارۍ د کابل په نړېوال کرکټ لوبغالي کې ترسره کیږي.
ویل کیږي، چې دغه سیالۍ به د راتلونکي اپریل میاشتې په ۱۰ مه نېټه د ۶ بېلا بېلو تجارتي لوبډلو په ګډون ترسره شي.
ویل کیږي، چې دریم پړاو (ميلیون لیګ) ۲۰ اوریزو کرکټ لوبو کې به ځانګړې نغمه او دغه راز د افغانستان د کورني کرکټ تکړه تبصره کوونکي هم په خپلو غږونو لوبو ته خاص خوند ورکړي.
د سیالیو چارواکي زیاتوي، چې درېیم پړاو (ميلیون لیګ) کرکټ سیالۍ به د افغانستان شمشاد ټلویزیون په پرده کرکټ مینه والو ته په ژوندۍ بڼه خپرې شي.
دوی زیاتوي چې اوسمهال د ګډون کوونکو لوبډلو په نوملړ کار روان دی او ډیر ژر به په دې سیالیو کې د ګډون کوونکو لوبډلو بشپړ نوملړ خپور کړي.
