د افغانستان کرکټ بورډ له خوا د روان کال درېیم پړاو الکوزي (شپږیزې) شل اوریزه کرکټ ټورنمېنټ مهال وېش اعلان کړ، چې راتلونکې میاشت به په کابل کې پیل شي.
د کرکټ بورډ له خوا خپره شوې خبرپاڼه کې راغلي دي، چې دا ځل به په درېیم پړاو شپږیزه ټورنمېنټ کې د لومړي ځل له پاره ۶ لوبډلې لوبې ترسره کړي.
د کرکټ بورډ له خوا د اعلان شوي مهال وېش له مخې به د سیالیو لومړۍ لوبه د نومبر میاشتې پر ۳ مه نېټه د دفاعي اتلې مس عینک او مرکزي زون بند امیر لوبډلو ترمنځ وشي.
په همدې ورځ به د دې شل اوریزه کرکټ مېلې لومړۍ اتله د سپین غر منتخبه لوبډله له امو زون لوبډلې سره د لوبې ډګر ته ووځي.
د کرکټ بورډ داعلان له مخې، چې سیالۍ به د نومبر میاشتې په ۳ مه نېټه پیل او د همدې میاشتې پر ۱۲ مه نېټه به په کابل الکوزي کرکټ نړیوال لوبغالي کې د اتلې لوبډلې په اعلان سره پای ته ورسېږي.
ټاکل شوې وه، دغه سیالۍ د تېرو کلونو په څېر د روان کال اګست میاشتې په ۲۵ مه نېټه پیل شوی وای، خو کرکټ بورډ، سیالۍ د بېلابېلو نوښتونو ژمنو په پایله کې راتلونکې میاشتې ته وځنډولې.
د اعلان له مخې به په دې سیالیو کې هره ورځ دوه دوه لوبې وشي، چې لومړۍ لوبه به سهار ۹ بجې او دویمه لوبه به ماسپښین ۱ بجه په کابل کې ترسره کېږي.
د لیګ سیالیو وروسته به ۴ مخکښې لوبډلې نیمه پای لوبو ته غوره شي، چې د نومبر ۱۱ مه نېټه به ترسره شي؛ خو د اتلولۍ ترلاسه کولو په موخه فاینل لوبې ته بیا ۱۲ مه نیټه اعلان شوې ده، چې غرمه ۱۱ بجې به پیل شي.
په دې سیالیو کې د نوي کابل بازان لوبډلې تر څنګ د پخوا په څېر بند امیر، امو، مس عینک، سپین غر او بوست لوبډلې برخه لري.
کرکټ بورډ درېیم پړاو شپږیزې ټورنمېنټ له پاره د بېلابېلو نوښتونو ژمنې کړې دي، چې سیالۍ په ښه کیفیت نشرول، نندارچیانو له پاره د سهولتونو برابرول، د لوبغالي رغول او د ځانګړې سندرې چمتو کول په کې په شامل دي.
