.jpg)
د افغانستان سایکل ځغلونې فدراسیون او د المپیک ملي کمېټې په همکارۍ نن ورځ د افغانستان ۲ تنه سایکل ځغلوونکیو په هېواد کې د سولې ټینګښت، د قانون پلي کولو او قانون ته د درناوي پیغام رسولو په موخه له کابله د بلخ ولایت په لور روان شول.
دغه دوه لوبغاړي روح الله نظري او ایمل نبي زاده نومیږي چې د یوشمېر نورو سایکل ځغلوونکیو په موقتي ملګرتیا د افغانستان المپیک ملي کمېټې د ځای ناستي مشر باور هوتک او نورو چارواکیو په شتون کې د المپیک ملي کمېټې له ودانۍ څخه د بلخ ولایت په لور رخصت شول.
د افغانستان المپيک ملي کمېټې ځای ناستي مشر باور خان هوتک رسنیو سره په خبرو کې وویل چې لوبغاړي په افغانستان کې د ورورولۍ، د سولې سفیران او پیغام رسوونکي دي. نوموړي دغه راز د افغانستان سایکل ځغلونې فدراسیون څخه هم مننه وکړه چې د یو مهم پیغام رسولو لهپاره یې د دې سفر نوښت کړی دی.
.jpg)
همدارنګه د افغانستان د بدني روزنې ریاست لهخوا د افغانستان ۱۵ کسیزه ووشو ملي لوبډله هم د ووشو په مسلکي سیالیو کې د ګډون په موخه پاکستان ته ولاړه.
د ورکړل شویو معلوماتو لهمخې، د افغانستان په ووشو ملي لوبډله کې ۶ مسلکي او ۵ اماتور لوبغاړي شامل دي؛ ورسره ۲ لوبڅاران یو روزونکی او ۱ د سفر مسوول هم ملتیا کوي چی نن د افغانستان د بدني روزنې د رییس حفیظ الله ولي رحیمي سره له لیدنې وروسته د پاکستان په لور رخصت شول.
ټاکل شوې ده د پاکستان په کوېټه کې به د لومړي پړاو مسلکي ووشو سیالۍ د روانې جنورۍ میاشتې له ۲۵ تر ۲۷ نېټې د کوېټي ښار په کوربتوب پیل شي.
د افغانستان د بدني روزنې ریاست د معلوماتو لهمخې، په پاکستان کې د لومړي پړاو مسلکي لومړي پړاو ووشو سیالیو وروسته به دویم پړاو سیالۍ د افغانستان په کوربتوب په کابل کې ترسره شي.
