بوگون «جمعه» ایرتهلب، سپینبولدک-چمن چیگرهسی یقینی لقمان قیشلاغیده افغانستان و پاکستان چیگره کوچلری آرهسیده آتیشمه باشلنگن و حاضرگچه دوام ایتماقده.
قندهار امنیتی رسمیلرینینگ ایتیشیچه، پاکستان حربیلری نفوس سنهش بهانهسی بیلن افغانستان توپراغیگه کیریش نیتیده بولگن و نتیجهده افغانستان کوچلرینینگ قرشیلیگیگه روپهره بولگنلر.
قندهار پولیس قومندانلیگی اورین باسری غورزنگ اَفریدینینگ ایتیشیچه، اوشبو آتیشمه نتیجهسیده حاضرگچه پاکستان حربیلرینینگ ایکی تانکی اوتگه تارتیلگن و حاضرگهقدر آتیشمه دوام ایتماقده.
قندهار پولیس قومندانلیگی سوزلاوچیسی ضیاء دورانینینگ ایتیشیچه، آتیشمه جریانیده افغانستان چیگره کوچلریدن 3 تهسی یرهلنگن، بیراق پاکستان حربیلرینینگ تلفاتی توغریسیده معلومات قولگه کیریتیلمهگن.
شونینگدیک، پاکستان حربی کوچلرینینگ سوزلاوچیسی آصف غفور، رسمی تویتر صحیفهسیده واقعهنی تصدیقلب یازیشیچه، بو آتیشمهده بیر تینچ اهالی هلاک ایتیلگن و باشقه 4 پاکستانلیک چیگره پولیسی شامل 18 حربی یرهلنگن.
واقعه گواهلرینینگ ایتیشیچه، افغانستان و پاکستان چیگره کوچلری آرهسیده یوز بیرگن آتیشمهدن سونگ، سپینبولدک-چمن چیگرهسی یولاوچیلرنینگ یوزیگه یاپیلگن.
