اوشبو مراسمده جمهور رییس غنینینگ ایتیشیچه، افغانستاننینگ اقتصادی احتیاجلریگه وقتینچهلیک ییچیم یول جواب بیره آلمهیدی و حکومت بوتون قیینچیلیکنی حل ایتیش اوچون سعی و حرکت قیلهدی. جناب غنیگه کوره، افغانستان صادر ایتووچی مملکتگه اوزگرگونگهقدر، تینچلیکنی اویقوده هم کوریب بولمهیدی.
افغانستان-هند هوایی دهلیز پروژهسینینگ مسؤولی صدیقالله مجددی، هوایی دهلیز آچیلیشیدن مقصد سوداگرلیک میزانی آشیریلیشی و افغانستاننینگ ییر تجارتیگه توسیق نرسهلرنی رفع ایتیش دیگن.
جناب مجددیگه کوره، بوگون 5 میلیون دالرلیک 60 تُن طبیعی ایکینچیلیک محصولاتی یوکلنگن بیرینچی تیک اوچر ینگی دهلی مقصدی ده کابلنی ترک ایتدی و کیلهجک هفته قندهار هوا قونالغهسیدن 2 میلیون دالرلیک 40 تُن قوریق میوه ینگی دهلیگه انتقال بیریلهدی.
مجددینینگ ایتیشیچه، سوداگرلیکنی رواجلنتیریش ملی بیرلیک حکومتنینگ استراتیژیکی مقصدلریدن بیری دیر.
اونگه کوره، بوندن آلدین مملکت سوداگرلری، هر بیر کیلوگرام تَوَرنی هندگه انتقال بیریش اوچون 70 امریکا سِنتی خرچ قیلر ایکن؛ حاضر بو خرجت 20 سِنتگه کمهیگن.
اوشبو مراسمده هند ایلچیسی افغانستاندن حمایه قیلیشلری توغریسیده ایشانچ بیریب و ایکی مملکتنینگ سوداگرلیک علاقهلری کینگهییشی اوستیگه تأکیدلگن.
شونینگدیک، صنعت و سوداگرلیک اتاقی مسؤوللری، حکومتنینگ بو ایشینی خوش قرشیلب ایتیشیچه، افغانستاننینگ قوریق و ینگی میوهسی اوچون هندنینگ بازارلری یخشی دیر و بو دهلیز سوداگرلر اوچون کوپینچه قولیلیک یرهتهدی.
