افغانستان-هند خلق ارا سرمایه یاتقزیش و سوداگرلیک ایکینچی ییل‌لیک کورگزمه‌سی «ترقیات اوچون یول کورگزمه‌سی» نامی‌ده بوگون ممبی شهریده اجراییه باشلیغی عبدالله عبدالله، کابلده آمریکا ایلچیسی جان بس، هند ده آمریکا قوشمه ایالت‌لرینی شارژدافیری مارکی کارلسن، مالیه وزیرلیگی‌نینگ سرپرستی همایون قیومی و قطار سوداگرلر و سرمایه یاتقزیش‌لرنینگ اشتراکیده آچیلدی.
اوشبو کورگزمه‌ده افغانستانده کانلر، صنعت، انرژی، مخابرات و ایکینچیلیک بولیم‌لریده سرمایه یاتقزیش فرصت‌لری توغریسیده دنیا سرمایه یاتقزووچی‌لریگه معلومات بیریلدی.
افغانستان-هند کورگزمه‌سی آچیلیش چاغیده کابل بوییچه آمریکا ایلچیسی جان بس نینگ ایتیشیچه، بونده‌ی کورگزمه‌لر یولگه قوییلیشی بیر تامانیدن افغانستان سوداگرلریگه سوداگرلیک علاقه‌لرینی کینگه‌یتیریشی گه یاردم بیره‌دی و باشقه بیر تاماندن اولرنینگ سوداگرلیک و سرمایه یاتقزیش معامله‌لری کینگه‌ییشی گه سبب بوله‌دی.
اونگه کوره، افغانستان کیله‌جگی اقتصادی رواجلنیشی گه باغلیق دیر و شو یوزه‌دن بیز و باشقه مملکت‌لر جمله‌دن هند ده بولگن همکارلریمیز بیلن افغانستان گه یاردم بیره‌میز و بو مملکت‌نینگ سوداگرلیگی رواجلنه‌دی و خود کفالیک‌که ییتیشه‌دی.
اجراییه باشلیغی عبدالله عبدالله نینگ ایتیشیچه، اوتگن ییل یولگه قوییلگن افغانستان-هند خلق ارا بیرینچی کورگزمه‌سیده ایکی مملکت آره‌سیده چمه‌سی 200 میلیون دالرلیک سوداگرلیک و سرمایه یاتقزیش شرطنامه‌لر امضاءلندی و بو رقم ایکینچی ییل‌ده کوپه‌ییشی کوتیله‌دی. بوندن مقصد کیچیک سرمایه یاتقزووچیلر و عیال سرمایه یاتقزووچیلردن حمایت قیلیش دیر.
افغانستان-هند خلق ارا سوداگرلیک و سرمایه یاتقزیش ایکینچی کورگزمه امریکا قوشمه ایالت‌لری‌نینگ مالی حمایتی و بو مملکت‌نینگ خلق ارا رواجلنتیریش اداره‌سی یا-ده USAID تامانیدن یولگه قوییلگن. بو کورگزمه‌ده 2000 مینگ‌دن آرتیق افغانی‌لیک، هندی‌لیک، آمریکالیک و باشقه دنیا شرکت‌لری اشتراک قیلگن. بو آره‌ده 200 افغانی‌لیک شرکت، 1200 هندی‌لیک سرمایه یاتقزووچی و شرکت و 100 دن آرتیق خلق ارا شرکتی اشتراک قیلگن.
بو کورگزمه‌ده افغانستان‌لیک خذمت‌لر و محصولات جمله‌دن لوکس و نمایشی کییم‌لر، ایکینچیلیک، انرژی، ساغلیک، معارف، عالی اوقوو وزیرلیگی، کانلر، تاش صنعت‌لری و سرمایه یاتقزیش فرصت‌لری نمایش گه قوییلگن.
اوشبو کورگزمه هندنینگ ممبی شهریده یولگه قوییلگن و بو کورگزمه تورت کون کورووچی‌لر اوچون آچیق توره‌دی.
