هرات ولایتی‌نینگ بشر حقلری کمیسیونی ساحه‌وی دفتری رسمی‌لری‌نینگ ایتیشیچه، بو ییل مملکت غربی حوزه‌سیده‌گی تورت ولایت‌ده تینچ اهالی تلفاتی کمیده 15 فایز کوپه‌یگن.
هرات ولایتی بشر حقلری کمیسیونی‌نینگ دفتری باشلیغی عبدالقادر رحیمی، افغانستانده اوروش قربانلری ملی کونی و 10- دسمبر، بشر حقلری خلق ارا کونی‌دن نشانلش مراسمی‌ده ایتیشیچه، جاری ییل باشلنگنی‌دن بویان، مملکت غربی حوزه‌سیده 74 تینچ اهالی هلاک بولیب رویخطگه آلینگن؛ اوشبو رقم اوتگن ییل 64 قضیه ایکن. جناب رحیمی‌گه کوره، بو ییل قربانلریگه 47 ایرکک، 13 عیال و 14 باله شامل بوله‌دی.
جناب رحیمی‌گه کوره، اوشبو رقم یالغیز بشر حقلری کمیسیونی قول تاپگن منطقه‌لردن توپلگن و تلفات رقمی بوندن آرتیق بولیشی هم ممکن.
هرات ولایتی بشر حقلری کمیسیونی دفتری باشلیغی‌نینگ ایتیشیچه، اوشبو تینچ اهالی‌لر حکومت کوچلری و طالبان گروهی حربی عملیات‌لری، ماین پارتلش‌لر و هوایی هجوملر نتیجه‌سیده جان بیرگن‌لر.
شونینگ‌دیک رحیمی‌نینگ ایتیشیچه، افغانستان حکومتی ایریم قضیه‌لرگه بشر حقلری‌نی نقض قیلگن؛ بیراق حکومت تامانیدن بشر حقلری نقض بولگنی خصوصیده رقم ارایه ایتیلمه‌گن.
عین حالده، هلمند ولایتی بشر حقلری کمیسیونی رسمی‌لری، مذکور ولایت‌ده بشر حقلری کینگ شکلده نقض بولگنی‌دن خواطر بیلدیریب، تینچ اهالی هلاکتی 3 فایز کوپه‌یگنی‌دن خبر بیره‌دی. اوشبو رسمی‌لرگه کوره، مذکور ولایت‌ده اوتگن ییل‌دن بویان 50 باله و 49 عیال شامل 739 تینچ اهالی هلاک بولگن. شونینگ‌دیک اولرگه کوره، هلمند ولایتی‌ده جاری ییل عیال‌لرگه قرشی 550 زوره‌وانلیک قضیه رویخطگه آلینگن.
هلمند ولایتی بشر حقلری کمیسیونی دفتری باشلیغی محمدبلال صدیقی، مذکور ولایت‌ده اوروش شدت‌لنیش دلیلی‌نی بشر حقلری نقض بولگنی‌دیب بیله‌دی.
گزارشلر اساسیده، اوتگن ییل‌دن بویان افغانستانده تینچ اهالی تلفات رقمی تکرارسیز شکلده کوپه‌یگن.
