افغانستان سبا د (ریو) المپیک سیالۍ په جودو لوبې پیلوي

ټاکل شوې ده، د ۲۰۱۶ کال برازیل په (ریو) المپیک سیالیو کې د افغانستان لوبغاړي د لومړي ځل له پاره د لوبې ډګر ته ووځي.

د سیالیو د رسمي وېبپاڼې د معلوماتو له مخې، د سبا ورځې په سیالۍ کې به د افغانستان له پاره لومړی لوبغاړی توفیق بخشي په ۱۰۰ کیلو ګرامه وزن کې د (جودو) سیالۍ وکړي.

د سبا ورځې په سیالیو کې به توفیق بخشي خپله لومړۍ سیالۍ د پرتګالي لوبغاړي جورګ فانسیکا پر خلاف وکړي.

د دواړو لوبغاړیو محمد توفیق بخشي او پرتګالي جورګ ترمنځ د سبا نېټې سیالۍ به د افغانستان پر وخت د شپې ۱ بجه وشي.

په راغلي مهالوېش کې که افغان توفیق بخشي بریا ترلاسه کړي؛ نو د مډال ګټلو له پاره به د نړۍ په ۳۲ غوره لوبغاړیو کې ځای ترلاسه کړي او بیا به (پري کوارټرفاینل) پړاو ته د رسېدو له پاره د یوې بلې لوبې چانس وګټي.

د برازیل په روانو المپیک سیالیو کې د افغانستان له خوا دا ځل ۳ لوبغاړیو برخه اخیستې ده، چې په (وایلډ کارت) یا افتخاري توګه د ګډون اجازه ورکړل شوې ده.

د ریو په المپیک سیالیو کې به د افغانستان ۲ نور لوبغاړي کیمیا یوسفي او عبدالوهاب ظاهري په ځغاسته (اټلاټیک) سیالیو کې لوبې کړي.

د روانو المپیک سیالیو په دوام ۴ مه ورځ هم د امریکا په مخکیوالي سره پای ته ورسېده، چې د خپلو مډالونو شمېر یې ۲۶ ته ورسولو.

د المپیک سیالیو د تاریخ زیات مډال ګټونکي امریکایي لامبو وهونکي مایکل فیلیپس په څلورمه ورځ لوبو کې ۲ نور د سرو زرو مډالونه هم وګټل او دغه شمېر یې په روانو سیالیو کې درېیو ته ورسولو.

دغه راز لومړۍ شمېره ښځینه ټینس لوبغاړې سرینا ویلیمز بیا د ماتې په خوړلو سره په روانو المپیک سیالیو کې له مخکې تګه پاتې شوه.

امریکا ته په جمناسټیک لوبو کې ۱۹ کلنې سمون بایلز هم د سروزرو مډال وګټلو، چې په نورو سیالیو کې چینایۍ شیو زیونګ هم په ۶۹ کیلو ګرامه وزن اوچتونه کې د سرو زرو مډال ترلاسه کړ.

دغه راز د هنګري له پاره په لامبو وهنه کې کاتینکا په روانو سیالیو کې درېیم د سرو زرو مډال ترلاسه کړ او په دې سره یې هنګري هېواد په روانو المپیک سیالیو کې له اسټرالیا څخه وړاندې کړ او څلورم مقام ته یې ورسولو.

د تمانچې په مرسته نښه ویشتنه کې ۲۰ کلنې یونانۍ انا کوراکاکي خپلې المانۍ سیالۍ ته ماتې ورکړه او یونان ته یې په روانو المپيک سیالیو کې لومړی د سرو زرو مډال وګټلو.

د څلورمې ورځې تر پایه امریکا په ۲۶ مډالونو لومړی، چین په ۱۷ مډالونو سره دویم او هنګري بیا په ۶ مډالونو سره درېیم مقام خپل کړ.