افغانستان د زورخانه یي په نړیوالو سیالیو کې ۶ مډالونه وګټل

د افغانستان زورخانه يي ملي لوبډلې د اندونیزیا په کوربتوب په ۲م پړاو نړیوالو زورخانه يي او غېږنېونې سیالیو کې ۶ د برونزو مډالونه ګټلي دي.

د ورکړل شویو معلوماتو له مخې د افغانستان له پاره ۵ لوبغاړو په ټیمي لوبه کې او حکیم الله بیګزاده په یوازې ځان د برونز مډال وګاټه.

دغه سیالۍ د یوې ورځې له پاره د اندونیزیا په پلازمېنه جاکرتا کې ترسره شوې، چې ایران د اتلولۍ جام لومړی مقام وګټلو.

دغه راز افغانستان بیا د اتلې ایران او ازربایجان هېوادونو وروسته په ۶ مډالونو سره له نورو هېوادونو وړاندې درېیم مقام ترلاسه کړ.

همدارنګه د دې سیالیو په دوام نن (دوشنبه) د افغانستان لوبغاړي احمد شکیب عطایي، مصطفی نورستاني، عمرګل مومني او مشتاق حس شریفي  په پهلوانۍ برخه کې د سیالانو خلاف لوبې وکړي.

د اندونیزیا په کوربتوب په دغو نړیوالو سیالیو کې د۸۴ هېوادونو لوبغاړو برخه اخیستی وه، چې د افغانستان له پاره ۷ لوبغاړي حکیم الله بیگزاده، مصطفی نورستانی، ذلگی رحمتي، صميم نیازی، احمد شکیب عطایي، عمر گل مومن زاده او مشتاق حسن شریفی غوره شوي وو.

د افغانستان المپیک ملي کمېټې د معلوماتو له مخې د اندونیزیا په کوربتوب له سیالیو مخکې د زورخانه يي او غېږنیونې نړیوال فدراسیون ټاکنې هم ترسره شوې، چې د افغانستان زورخانه يي فدراسیون مشر او د افغانستان المپیک ملي کمېټې پخواني مشر محمد انور جګدلک په زیاتو رایو سره امریکایي او استونیایي سیالانو ته ماتې ورکړې او له مشر ایراني مهرعلیزاده وروسته د نړیوال فدراسیون مرستیال وټاکل شو.

محمد انور جګدلک اوسمهال د اسیا زورخانه يي او غېږنېونې فدراسیون مشري هم په غاړه لري، چې دغه ګومارنه په افغانستان کی د دغه لوبې پرمختګ کې مرسته کولای شي.