آمریکا تشقی ایشلر وزیرلیگی نینگ ایتیشیچه، افغانستان تینچلیک لایحه‌سی بوییچه آمریکانی خاص نماینده‌سی زلمی خلیلزادنینگ 7- دور سفری اوتگن یکشنبه کوندن باشلنگن و می آیی نینگ 11- کونی‌گه‌قدر دوام ایتیشی ممکن.
آمریکا تشقی ایشلر وزیرلیگی تامانیدن ترقه‌تیلگن خبرنامه‌ده یازیلیشیچه، خلیلزاد بو دور سفریده افغانستان، هند، پاکستان، قطر، روسیه و بریتانیا باره‌دی.
جناب خلیلزاد، کابل‌ده ملی بیرلیک حکومت رسمی‌لری و سیاسی حزبلرنی تینچلیک مسئله‌سینی مقصدگه ییتیشتیریش خصوصیده آلقیش‌لیدی.
افغانستان تینچلیک لایحه‌سی بوییچه آمریکا تشقی ایشلر وزیرلیگی‌نی خاص نماینده‌سی زلمی خلیلزادنینگ اوز توییتر صحیفه‌سیده یازیشیچه، بو دور سفریده تینچلیک سوزلشوولری جریانیدن دنیا جماعه‌چیلیگی حمایتی‌نی جلب قیلیش و بو سوزلشوولرده اشتراک قیلیش اوچون افغانستان سیاستچی‌لرینی آلقیش‌لش خصوصیده سعی و حرکت قیله‌دی.
افغانستان تینچلیک لایحه‌سی بوییچه آمریکانی خاص نماینده‌سی نینگ ایتیشیچه، تینچلیک سوزلشوولری گه قرشی توسیقلر تینچلیک جریانی توغریسیده بولگن سعی و حرکت‌لر سُست‌لیگی‌نی کورستمه‌یدی.
زلمی خلیلزاد، 7- دور سفریده هم قطرده طالبان نماینده‌لری بیلن اوچره‌شه‌دی و اولرنینگ اوستیگه افغانستان سیاستچی‌لری بیلن اوچره‌شیش‌لری توغریسیده فشار کیلتیره‌دی.
فرانس پرس خبری آژانسی گه صحبت بیرگن قطرده‌گی طالبان گروهی سیاسی دفترینی سوزلاوچیسی سهیل شاهین نینگ ایتیشیچه، اوتگن دور دوحه‌ده طالبان و آمریکا نماینده‌لری آره‌سیده اوتکزیلگن ییغینیده افغانستاندن چیت‌ایللیک کوچلر بوتونله‌ی چیقیشی توغریسیده کیلیشیلگن و کیله‌جک ییغینده بو موضوع نی جزئیاتی توغریسیده بحث قیلینه‌دی، بیراق آمریکا قوشمه ایالت‌لریگه تیگیشلی منبع بو توغریده رسمی شکلده بیر نرسه دیمه‌گن.
