.jpg)
سونگی کونلرده افغانستان‌گه قیتیب کیلگن قاچقین‌لر وضعیت‌دن شکایت قیله‌دیلر. اولرنینگ ایتیشیچه، هوا کونسایین ساووق بولگنی و یشش اوچون مناسب مکان یوقلیگی، اولرنی جدی قیین‌چیلیک‌که روپه‌ره قیلگن.
ینگی‌لیک‌ده پاکستان و ایراندن قیتیب کیلگن قاچقین‌لر وضعیتی‌نی کوریش اوچون کابل شهری اوچینچی پروان منطقه‌سیگه باش اوردیم و یامغیرلی هواده خیمه‌لر آستیده یشه‌یدیگن عایله‌لر بیلن اوچره‌شدیم. بیراق، بو عایله‌لر یشش اوچون مناسب مکان یوقلیگی یانیده کَم‌بغل‌لیک و قشاقلیک‌که دوچ کیلیب تورگن‌لر.
سونگی کونلرده عایله‌سی بیلن افغانستان‌گه کیلگن عیال‌لردن بیری نجیبه‌نینگ ایتیشیچه، باله‌لری کسل و آچ دیر. اونینگ ایتیشیچه، هیچ بیر باش پناه یوق و بو قیین‌چیلیک‌که چیده‌ش‌گه مجبور دیر.
قاچقین‌لردن باشقه بیری لالاجان‌نینگ ایتیشیچه، حکومت هر بیر آیده اولرگه بیر بوجی اون بیره‌دی، بیراق بو یاردم اولرنینگ هیچ بیر دردینی دارولمه‌یدی.
بو باشکینت‌ده یشه‌یدیگن قاچقین‌لرنینگ تیریکچیلیگی‌دن حکایه دیر. قندوز، ننگرهار و قندهار ولایت‌لری‌نینگ ایچکی بدرغه و قاچقین‌لری شونده‌ی قیین‌چیلیک‌لرگه دوچ کیلیب تورگن‌لر.
.jpg)
ینگی‌لیک‌ده ناتینچ منطقه‌لردن عایله‌سی بیلن بیرگه قندوزگه بدرغه بولگن عیال معصومه نینگ ایتیشیچه، عایله‌سینی ایسیق سقلش اوچون هیچ نرسه‌سی یوق دیر و کیچه‌لر کورپه‌لرنی اوستونمه اوستون تشلب اویقوله‌یدیلر.
عین حالده، قاچقین‌لر و باش پناه ایزلاوچی‌لر وزیرلیگی مصلحتچیسی حفیظ‌الله میاخیل‌نینگ ایتیشیچه، 68 مینگ‌دن آرتیق نیازمند عایله گه یاردم بیرووچی اداره‌لر و قاچقین‌لر وزیرلیگی تامانیدن یاردم بیریلگن. جناب میاخیل‌گه کوره، ضروری یاردملر قطار ولایت‌لرنینگ بدرغه‌لریگه یوباریلگن و بو ایش حاضرگچه دوام ایتماقده.
قاچقین‌لر وزیرلیگی تامانیدن بیریلگن رقم اساسیده، جاری ییل‌ده 628 مینگ کیشی ایران و پاکستان مملکت‌لریدن افغانستان‌گه قیتیب کیلگن‌لر و باشقه کمیده 520 مینگ کیشی اوروش و ناتینچلیک‌لر باعث، منطقه‌لریدن بدرغه بولگن‌لر.
عین حالده، افغانستان قاچقین‌لریدن کمیده 2 میلیونی ایرانده و 2 میلیوندن آرتیغی پاکستانده یشه‌یدی.
