شاعر و افغانستانلیک بیدل‌شناس محمدعبدالعزیز مهجور بوگون ایرتلب حیات‌دن کوز یومدی. مهجور 72یاشیده هندنینگ دهلی شهریده عالمدن اوتگنی خبر قیلیندی. استاد مهجور قویاش 1324-ییل‌ده افغانستان‌نینگ قندهار شهریده دنیاگه کیلگن. باله‌لیک‌ده اصلی آنه یورتی بولمیش کابل‌گه کیلگن. او، دستلبکی تعلیم و تربیه‌نی عاشقان وعارفان و امانی مکتبلریده آلگن.
مهجور، مکتب‌نینگ عالی دوره‌سیده آته‌سی استاد محمد عبدالحمید اسیر «قندی آغا» یولیدن باریب، بیدل‌شناسلیک‌که یوز کیلتیرگن. او، بیدل‌شناسلیک بوییچه آته‌سیدن قالگن اثرلرنی اوقیش بیلن شغلله‌نیب، هر بیر ییغین و اولتیریشلرده بیدل هنری حقیده سوز یوریتگن.
استاد مهجور، مکتب‌نی بیتیریش بیلن کابل بیلیم یورتی نینگ اقتصاد فاکولته‌سیگه یول آلگن. اونینگ تحصیل‌دن کیین مملکت همده تشقی دولتلرده تورلی لوازملرده ایشله‌گن لیگی ایتیله‌دی. اوشبو ییتوک بیدل‌شناس سونگی اوتیز ییل ایچیده بوتون عمرینی ادبی مقاله‌لر همده تصوفی شعرلر یازش‌ده صرفله‌گن. اونینگ اثرلری ژوناللر، کونده‌لیکلر و ایریم جریده‌لرده نشر بولگن.
استاد محمدعبدالعزیز مهجور، قویاش 1381-ییل‌ده هندنینگ دهلی شهریده‌گی اسلامیه بیلیم یورتی تامانیدن آلینگن خلق ارا ابولمعانی عبدالقادر بیدل‌گه بغیشله‌نیب آلینگن ییغین‌گه چقیریلگن.
اوشبو ییغین‌ده اونگه بیدل‌شناسلیک بوییچه افتخاری دوکتورا بیریلگن. استاد مهجورنینگ جسدی بوگون دهلی‌دن کابل‌گه آلیب کیلینیشی کوتیله‌دی.
