افغانستان جمعیتی‌ده کوپینچه ایرکک‌لر عمومی ییرلرده آنه‌سی، سینگلیسی و تورموش اورتاقلری‌نینگ آتی‌نی توتمه‌یدیلر و شونینگ‌دیک، توی و فاتحه کارت‌لریده عیال‌لرنینگ آت‌لری یازیلمه‌یدی.
افغانستان جمعیتی‌ده عیال‌لر ییریک فرزندلری و یا-ده تورموش اورتاقلری‌نینگ آتی‌گه توتیله‌دی.
بو وضعیت سبب، اجتماعی ترماقلرده بیرقطار عیال‌لر، «آتیم قه‌ییرده؟» نامی آستیده کمپاین یولگه قویگن‌لر.
اوشبو کمپاین‌نینگ باشلنگنی‌دن نیچه کون اوته‌دی و کورینیشیچه، اجتماعی ترماقلرده قیزیق شکلده خوش قرشی‌لنگن.
بو کمپاین‌ده افغانستان عیال‌لری، اوز تجربه‌لرینی یازگن و شونینگ‌دیک، دولت ایشلاوچی‌لریدن بیرقطاری، کورگن نرسه‌لرینی یوزه‌گه چیقارگن‌لر.
کمپاین‌نی یولگه قویگن‌لرنینگ سلام‌وطندارگه ایتیشیچه، بو کمپاین‌دن مقصد اجتماع ده عیال‌لرنینگ آتی ایرکک‌لر تامانیدن توتیلمس تابوسی‌نی سیندیریش و شونینگ‌دیک، عیال‌لرنینگ کیم‌لیگی خصوصیده دادخواهلیک قیلیش دیر.
.jpg)
بو کمپاین‌نی یولگه قویگن‌لردن بیری نیلوفر نیکسیرنینگ ایتیشیچه، اوشبو کمپاین اجتماع‌ده عیال‌لرگه قرشی دوام ایتیب کیله‌یاتگن سنت‌گه قرشی کوره‌ش اوچون یولگه قوییلگن.
خانم نیکسیرگه کوره، اولر «آتیم قه‌ییرده؟» کمپاینی آرقه‌لی مملکت عیال‌لریگه کیم‌لیک‌لری و آت‌لری توغریسیده دادخواهلیک قیلیش جسارتی‌نی بیره‌دیلر.
«آتیم قه‌ییرده؟» کمپاین‌نی یولگه قویگن‌لردن باشقه بیری لاله عثمانی‌نینگ سلام‌وطندارگه ایتیشیچه، شو کیچه کونده اجتماعی ترماقلرده یشاوچیلردن بیرقطاری، مذکور کمپاین‌دن حمایت بیلدیریب و عایله اعضالریدن بولگن بیر عیال‌نینگ آتی‌نی قوییب بیر- بیراوینی بحث‌گه تارتگن‌لر.
اوشبو کمپاین اجتماعی ترماقلرده کینگ شکلده خوش قرشی‌لنگن و بو کمپاین‌نی یولگه قویگن‌لرنینگ امید بیلدیریش‌لریچه، اجتماع‌ده عیال‌لرنینگ آتی توتیلمس تابوسی‌نی سیندیریش و عیال‌لرنینگ کیم‌لیگی خصوصیده دادخواهلیک ایشی‌نی بیرگن‌ده، اجتماع بوندن کیین عیال‌لرنینگ کیم‌لیگی‌دن اِنکار قیله آلمه‌یدی.
بو کمپاین (24- جوزا) عیال‌لر کونی‌ده «کیم‌لیک بحرانی و فرزندلری‌نینگ آتی‌گه تانیله‌دیگن عیال‌لر» عنوانی‌ده سلام‌وطندار رادیوسی تامانیدن ترقه‌تیلگن گزارش اجتماعی ترماقلرده کینگ شکلده یوکسلگندن کیین یولگه قوییلگن و کورینیشیچه، ایسلنگن گزارش «آتیم قه‌ییرده؟» کمپاینی یولگه قوییلیشی خصوصیده اونملی رول اوینه‌گن.
