بوگون «یکشنبه» دوحه شهریده قطر و آلمان میزبانلیگی ده طالبان گروهی نینگ نماینده‌لری و افغانستان سیاستچی‌لری، عیاللر، میدیالر و مدنی جماعه‌چیلیک اداره‌لرنی نماینده‌لریدن تشکیل ایتیلگن هیأت حضوریده افغانستانلیک‌لر ارا ایکی کونلیک تینچلیک سوزلشوولری باشلندی.
اوشبو ییغین یولگه قوییلیشیدن مقصد، اشتراکچی‌لرنینگ آره‌سیده اوتمیش‌لری، اعتقادلری و تورلی غایه‌لری بیلن بی‌واسطه همکارلیک قیلیش و اوز ارا علاقه اورنه‌تیش دییلگن.
تشکیلاتچی‌لرگه کوره، بو ییغین اشتراکچی‌لرنینگ آره‌سیده ایشانچ ایجاد قیلیش، دایمی تینچلیک جریانی خصوصیده کیشی‌لرنینگ روللری تانیلیشی، دایمی تینچلیک جریانی توغریسیده توزه‌تیله‌دیگن ریجه قنده‌ی بولیشی اوچون توشونچه‌لرینی شریک قیلیش و بو ریجه برچه گه قبول بولینیشی اوچون یولگه قوییلگن.
افغانستان تینچلیک لایحه‌سی بوییچه آمریکا تشقی ایشلر وزیرلیگی خاص نماینده‌سی زلمی خلیلزاد، افغانستانلیک‌لر ارا تینچلیک سوزلشوولر ییغینی باشله‌نیش مراسمی‌ده نطق سوزله‌گنیدن سونگ، خبرچی‌لرگه ایتیشیچه، بو سوزلشوولر افغانلر ارا بوله‌دی و افغانلر بیر-بیراوی بیلن مذاکره قیلیشی کیره‌ک.
جناب خلیلزادگه کوره، بو ییغین افغانلر یقین‌لنیشی و اوز ارا سوزلشوولریگه یخشی زمینه یره‌ته‌دی.
قطرده طالبان گروهی نینگ سیاسی دفتری سوزلاوچیسی سهیل شاهین نینگ ایتیشیچه، افغانلر ارا یولگه قوییلگن بوگونکی ییغین اولرنی بیر-بیراوی گه یقینلشتیره‌دی و تینچلیک‌که ایریشیش خصوصیده، تأثیرچن بوله‌دی. اونگه کوره، بونده‌ی ییغین‌لر یولگه قوییلیشی افغانستانده تینچلیک تأمین‌لنیشی گه سبب بولیشی ممکن.
جناب شاهین نینگ ایتیشیچه، بوگونکی ییغین اشتراکچی‌لری افغانستانده تینچلیک تأمین‌لنیشی خصوصیده شخصی توشونچه‌لرینی بیان قیله‌دیلر.
اوشبو ییغینده حکومتی سیمالردن اداری اصلاحات و ملکی خذمت‌لر کمیسیونی باشلیغی نادر نادری، محلی ارگانلر ایرکین اداره‌سی باشلیغی عبدالمتین بیگ، ملی خوفسیزلیک کینگشی اورین باسری شهرزاد اکبر و محلی ارگانلر ایرکین اداره‌سی اورین باسری تیمور شاران اشتراک قیلگن‌لر. بیراق ییغین اشتراکچی‌لریدن برچه‌سی شخصی ظرفیت‌لری اساسیده بارگن‌لر و هیچ بیری حکومت نینگ آدرسیدن اشتراک قیلمه‌گن.
شونینگدیک، قطرنینگ دوحه شهریده آمریکا و طالبان گروهی نینگ نماینده‌لری آره‌سیده یولگه قوییلگن 7- دور تینچلیک سوزلشوولری، افغانستانلیک‌لر ارا ییغین یولگه قوییلگنی باعث، ایکی کون توخته‌تیلدی.
اوتگن کیچه افغانستان تینچلیک لایحه‌سی بوییچه آمریکا قوشمه ایالت‌لرینی خاص نماینده‌سی زلمی خلیلزادنینگ سلام‌وطندارگه ایتیشیچه، طالبان بیلن اوتکزیلگن 7- دور سوزلشوولری «اوتکزیلگن ییغین‌لرنی اینگ یخشی دوره‌سی» بولگن و بو دور سوزلشوولریده دییرلی نتیجه‌لر اورته گه کیلگن.
شو توغریده…
خلیلزاد: 7- دور سوزلشوولری «طالبان بیلن اوتکزیلگن اینگ یخشی ییغین» ایدی
