بوگون «یکشنبه» کابل‌ده خبری بیر ییغین اوتکزگن افغانستان تشقی ایشلر وزیرلیگی سوزلاوچیسی صبغت‌الله احمدی نینگ ایتیشیچه، تینچلیک سوزلشوولری اونملی باسقیچ گه ییتیشگن.
اونگه کوره، افغانستان کیله‌جک کونلرده تینچلیک سوزلشوولری خصوصیده یخشی خبرلرگه گواه بولیشی ممکن.
تشقی ایشلر وزیرلیگی سوزلاوچیسی نینگ ایتیشیچه، مملکت تشقی ایشلر وزیری صلاح‌الدین ربانی، آلمان گه قیلگن سفریده مذکور مملکت نینگ رسمی‌لری بیلن تینچلیک سوزلشوولری خصوصیده صحبت قیلگن و آلمان کیله‌سی ایکی هفته ده افغانستانلیک‌لر ارا تینچلیک سوزلشوولری گه میزبانلیک قیله‌دی.
افغانستان بوییچه بیرلشگن ملت‌لر تشکیلاتی نینگ باش کاتبی‌نی خاص نماینده‌سی تدامیچی یاماموتو، بیر اعلامیه صادر قیلیب ایتیشیچه، افغانستان جمهورلیک ریاستی سیلاوی یولگه قوییلیشی و تینچلیک سوزلشوولری بیرلشگن ملت‌لر تشکیلاتی اوچون اونملی موضوعلر سنله‌دی.
اوشبو اعلامیه‌ده کیلیشیچه، تینچلیک و سیلاو افغانستان اوچون ایکی اساسی جریان دیر و بو ایکی جریان بیر-بیراوینی توخته‌تیب قویمه‌سی کیره‌ک.
عین حالده، افغانستان تینچلیک لایحه‌سی بوییچه آمریکا تشقی ایشلر وزیرلیگی نی خاص نماینده‌سی زلمی خلیلزاد ییتکچیلیگی‌ده آمریکا نماینده‌لر و طالبان گروهی آره‌سیده یولگه قوییلگن 7- دور تینچلیک سوزلشوولری ایکینچی کونی گه کیردی.
ایتیلیشیچه، بو دور سوزلشوولرده افغانستاندن چیت‌ایللیک کوچلرنینگ چیقیش زمانی و افغانستان توپراغیدن باشقه مملکت‌لرگه قرشی فایده‌لنمه‌سی اوستیگه کیلیشیله‌دی.
