افغانستان بوییچه بیرلشگن ملت‌لر تشکیلاتی نینگ باله‌لردن حمایت قیلووچی اداره‌سی یا-ده یونیسف مسؤوللری نینگ ایتیش‌لریچه، اوروش تامانلری آره‌سیده خودکش هجوملر و زوروانلیک‌لر کوپه‌یگنی باعث، افغانستان دنیا بویلب باله‌لر اوچون اینگ خوفلی منطقه تانیلگن.
افغانستان بوییچه یونیسف نماینده‌سی ابوبکر کامپونینگ ایتیشیچه، اوشبو مملکت‌ده 40 ییل‌لیک اوروش افغانستان باله‌لری نینگ اوستیگه هلاکت‌لی تأثیر قویگن. اونینگ کوپه‌یتیریشیچه، اوروش تامانلری باله‌لرنینگ خوفسیزلیگی‌نی سقلش خصوصیده بولگن وظیفه‌لریده ناکام قالیشگن.
جناب کامپوگه کوره، میلادی 2019- ییل‌نینگ بیرینچی 9 آیی‌ده 631 باله هلاک و باشقه 1830 باله یره‌لنگن و اورته شکلده افغانستانده هر کون 9 باله هلاک یا-ده ناگران بوله‌دی و بو رقم میلادی 2018- ییل‌نینگ بیرینچی 9 آیی‌گه نسبتن 11% آشگن.
یونیسف نماینده‌سی نینگ ایتیشیچه، حال بوکه میلادی 2018- ییل، افغانستان باله‌لری اوچون اینگ یامان ییل دییلگن، بیراق میلادی 2019- ییل‌ده اوروش قربانلریدن کوپینچه‌سینی باله‌لر تشکیل بیره‌دی.
جناب کامپو، افغانستانده‌گی اوروش تامانلریدن تینچ اهالی اینیقسه باله‌لرنینگ حیاتی گه جدی شکلده دقت قیلیش‌لرینی سوره‌یدی.
افغانستان بوییچه بیرلشگن ملت‌لر تشکیلاتی نینگ باله‌لردن حمایت قیلووچی اداره‌سی یا-ده یونیسف تامانیدن بیریلگن رقم اساسیده، افغانستانده 3.8 میلیون باله انسان دوستلیک یاردملریگه احتیاج بولیب تورگن و باله‌لردن 30% آغیر ایشلر بیلن شغللنه‌دیلر.
شونینگدیک، اوشبو گزارش‌گه کوره، شرایط‌گه ماس 3.7 میلیون باله مکتب باریشمه‌یدی و هر 3 قیزدن بیری 18 یاشینی تولدیرمس‌دن تورموش گه چیقاریله‌دی.
شو توغریده…
