شیره‌لی آواز ایگه‌سی افغانستانلیک یگانه اوزبیک عیال خواننده خانم سبزه گل 72 یاشیده پنج‌شنبه کونی اوزی نینگ توغیلیب اوسگن یورتی فاریاب ولایتی‌نینگ اندخوی تومنی‌ده عالمدن اوتدی.
اونینگ اولیمی افغانستانلیک اوزبیک‌لر صنعتی عالمی‌ده کته بیر یوقاتیش حسابلنه‌دی. چونکه او سونگی 25 ییل دور ایچیده مملکت اوزبیک‌لری آره‌سی‌ده بیر دن بیر عیال قوشیقچی صفتیده صحنه‌ده موجود ایدی.
اونینگ بو یاروغ دنیانی ترک ایتیشی بیلن آق افغانستانلیک اوزبیک‌لر نینگ صنعت دنیاسی عیال اشوله‌چی و هنر منددن به تمام بوشب قالدی دیسک خطا قیلمه‌گن بوله‌میز. چون که 1371 ییلی مجاهد لر حاکمیت تیپه‌سی گه کیلگن‌لری دن سونگ بیر قطار یاش اوزبیک عیال خواننده‌لر جمله‌دن خانم رشیده‌ژاله، لطافت، پروین و باشقه‌لر موسیقی عالمی بیلن وداع لشگن ایدیلر.
خوش، اوز اولیمی بیلن افغانستانده اوزبیک موسیقی‌سی میدانی‌نی عیال خواننده‌دن بوشه‌تگن سبزه‌گل کیم ایدی؟
اصل اسمی گل اندام بولگن، اما کوپراق مرجان و سبزه‌گل نام لری بیلن تنیلگن. او 14 یاشلری ده صنعت عالمی‌گه کیریب کیلگن. دپ – دایره همده طبله چلیش‌نی یخشی بیلگن مرحوم سبزه گل، حیاتی نینگ سونگی کونلری گچه اشوله اجرا ایتیش‌نی ترک ایتمه‌گن. او طالبلر حاکمیتی دوریده هم اندخوی تومنی‌ده توی تماشالرده قتنه شیب دپ – دایره چلیب قوشیقلر اجرا ایتیب یورگن.
سبزه گل یاش لیگی‌ده مهر قویگن موسیقی دنیاسی‌نی عمری‌نینگ سونگی کونلری گچه ترک ایتمه‌دی. سبزه گل‌نی هنر سیور بیر عایله‌ده دنیا گه کیلگنی ایتیله‌دی. آنه سی زلیخا آپه قیزینی هنرمند بولیب وایه‌گه ییتیشیشی اوچون زمینه یره تیب، اونی حمایت ایتیب کیلگن. کلاسیک خوان دوتارچی عیال مرجان اسملی هنرمند عیال‌گه شاگرد لیک قیلگن.
سابق قیرال محمد ظاهر حاکمیتی دوریده افغانستان دولت رادیوسی تولقین‌لریده ینگره‌گن اوزبیک تیلی‌ده گی بیرینچی عیال خواننده آوازی، سبزه گل سیسی بولگن. اوشه ییل‌لری موسیقی شناس بیر امریکا‌لیک تدقیقاتچی سبزه‌گل آوازی یازیلگن بیر قطار قوشیقلر پلاسینکه‌سی‌نی دولت رادیوسی اداره‌سی گه ساوغه قیلگن.
سبزه گل شهرتی بوندن چمه‌سی قیرق ییل‌لر آلدین اوز اوجی‌گه چیققن ایدی. ایندی تیپ ریکادرلر افغانستان گه آلیب کیلینگن ییل‌لری سبزه گل قوشیق‌لری یازیلگن کست‌لر افغانستانلیک اوزبیک‌لر تامانیدن اینگ کوپ ایشیتیلگن کست‌لردن سنه‌له‌دی. سبزه گل سیسی‌نی افغانستانلیک عیال خواننده‌لر آره سیده هندوستان لیک تنیقلی عیال اشوله‌چی لتا منگیشکر گه هم قیاسله‌گن‌لر. چون که سبزه‌گل اوزی‌نینگ آوازی مه‌یین لیگی، صافلیگی و جرنگ دارلیگی بیلن آت چیقرگن و عمری‌نینگ آخری گه‌چه هم آوازی‌ده سیره اوزگریش حس ایتیلمه‌گن.
سبزه گل در واقع محلی خواننده ایدی. اوقیش و یازیش نعمتی‌دن بی بهره قالگن لیگی هم اونی رسمی کنسرت‌لرده قتنه‌شیب، ینگی – ینگی قوشیقلر ایجادی ایتمه‌گنی گه سبب بولگن اساسی عامل‌لردن بیری بولگن بولیشی ممکن.
سبزه‌گل نینگ تورموش اورتاغی (ایری) فیض احمدی هم اوز دوری ده تنیقلی هنر مند بولگن. او یخشی رقاص، قوبوز (جنگ) نواز، دایره نواز بولگن. توله و هارمونیه‌نی مرامی‌گه ییتکزیب چلگن. اهالی‌نینگ توی تماشا‌لریده قتنه شیب قوشیقلر اجرا ایتگن. سبزه گل فرزندلی بولمه‌گن بولسه – ده، او کونداشی‌دن دنیا گه کیلگن فرزندلرنی هنرمند بولیب ییتیشیش‌لری اوچون کته رول اوینه گن. فیض احمدی‌نینگ ابوبکر اسملی اوغلی حاضرگی کونده هوسکار خواننده صفتی ده فعالیت آلیب بارماقده.
سبزه گل نینگ "تره له له ی"، "نای نای" و "اوزیم اون تورت یاشیم‌ده" کبی اوزبیکچه اشوله‌لری همده "گل باغ من بیا" و " شراب جان و گلاب جان" کبی فارسچه قوشیق‌لری اوته مشهور اشوله‌لریدن سنه‌له‌دی. ایریم عامل‌لر باعث سبزه‌گل نینگ قوشیق‌لری ویدیو فارمتی یازیلیب تلویزیون‌لر آ رقه‌لی یایینلنمه‌گن. در حقیقت سبزه‌گل خلق قوشیقچی‌سی حسابلنه‌دی.
سبزه گل‌نینگ هنرمندچیلیگی باشقه بیر جهت‌دن هم اوزیگه خاص اهمیت کسب ایته‌دی. او هم بولسه اونینگ صنعتی‌نی فوندامنتالیزم و اشدی گرچیلیک‌که قرشی اوزلوکسیز کوره‌ش آلیب بارگنی دیر. صنعت و هنرمندچیلیک اینیقسه عیال‌لر قوشیقچی لیگینی فوندامینتالیزم گه قرشی مهم جبهه دییش ممکن. و سبزه گل خانم کمیده 60 ییل دوامی‌ده اوشبو جبهه ده کوره‌ش آلیب باردی و بیر کون هم صحنه‌نی ترک ایتمه‌دی. طالبلر حاکمیتی دوریده هم سبزه گل دپ – دایره‌سی نی قولی‌دن تشله‌مه‌گن.
سبزه گل دنیا دن کیتیشی بیلن افغانستانلیک اوزبیک‌لر موسیقی‌سی کته بیر یوقاتیش‌گه یوز توتدی. مملکت ده اوزبیک موسیقی‌سی‌نی عیال هنرمند‌سیز قنده‌ی تصور ایتیش ممکن؟ هر حالده بیز بو باره ده انه شونده‌ی اچیق بیر حیقیت بیلن روپه ره میز. افغانستانده مجاهد‌لر حاکمیت‌گه ایریشگنی‌دن سونگ مملکت عیال‌لری جمله‌دن اوزبیک عیال‌لر جدی اجتماعی تضییق‌لرگه یوزلندی‌لر. طالبان دوریده اوشبو تضییق‌لر تاباره کوچه‌یدی. افغانستان موسیقی صنعتی دنیاسی‌ده اوشبو بوشلیق قچان تولدیریله‌دی افسوس که، هلی معلوم ایمس.
