د هرات ولایتي شورا رییس کامران علیزايي لسګونو پلویانو د ولایت مقام او اسلام کلا ښارګوټي مخې ته په لاریون راوتلي وو.
یو شمېر لاریونوالو درنې او سپکې وسلې له ځانه سره لرلې د څوو ساعتونو لهپاره یې د هرات ـ اسلام کلا لویه لار د ترافیکو په مخ تړلې وه.
اعتراض کوونکي وايي، د هرات ولایتي شورا رییس کامران علیزايي محاکمه کول د حکومت له لوري نوموړي ته جوړه شوې دسیسه ده. لاریونوال خبرداری ورکوي که غوښتنې یې ونه منل شي د هرات ـ کندهار لویه لار به د ترافیکو پرمخ وتړي.
دوی له حکومت او سترې محکمې غوښتل، د قانون په رڼا کې دې د علیزايي دوسیه حل کړي.
اعتراض کوونکي ټینګار کوي غوښتنې یې مشروع دی او د خپلو حقونو او امنیت ټینګښت لهپاره یې لاریون کړی دی.
د هرات د ولایتي شورا رییس کامران علیزايي هم د خپلو ملاتړو په ډله کې موجود و حکومت یې په زور زیاتې تورن کړ.
کامران وویل، په مرکز کې داسې کسان دي، چې په هرات کې د ده په پیاوړي شتون کې خپلې ګټې په خطر کې ویني او د نوموړي د ګوښه کولو هڅه کوي.
نوموړي خبردارې ورکړ له دې ورسته د حکومت نیمګړتیاوو په وړاندې چوپ نه پاتې کېږي او د ناامنیو لاملونو، حکومتي چارواکو له نیمګړتیاوو او له نورو بېغوریو به پرده پورته کړي.
د هرات د والي ویاند جیلاني فرهاد لاریون د خلکو قانوني حق بولي او وایي، د لاریون کوونکو غوښتنې به مرکزي حکومت ته ورسوي.
هڅه مو وکړه، د لاریون کوونکو د غوښتنو په اړه د سترې محکمې نظر هم واخلو، خو د سترې محکمې ویاند په دې اړه خبرو ته حاضر نه شو.
تېره اوونۍ عدلي او قضایي مرکز د هرات د ولایتي شورا رییس کامران علیزايي د وظفیوي صلاحیتونو څخه د ناوړه ګټې اخیستو په تور په دوه کاله او ۶ میاشتو بند محکوم کړ.
