کابل حوزهسی و باشقه بیرقطار ولایتلرده اوتکزیلگن نمایندهلر کینگشی سیلاوی نامزدلریدن بیرقطاری نینگ آتلری دستلبکی رویخطده موجود ایدی، بیراق سونگی رویخطدن چیقاریلگنیدن سونگ، بوگون اعتراض بیلدیرگنلر.
اوشبو نامزدلرنینگ ایتیشیچه، اولرگه قرشی عدالتسیزلیک بولگن و عدالتسیزلیککه قرشی جیم تورمهیدیلر.
اعتراضچیلرنینگ ایتیشیچه، اولرنینگ آوازلری زورهوان کیشیلر منفعتیگه سنهلگن و حقلریگه قول تاپیش اوچون خاص محکمه ایجاد ایتیلیشی کیرهک.
اعتراضچی نامزدلردن بیری سلیمه نیکبین نینگ ایتیشیچه، دستلبکی رویخط ده 1352 آواز قولگه کیلتیرگن ایدی، بیراق نهایی رویخط ده اونینگ آوازلری زورهوانلرگه بیریلگن.
اونینگ کوپهیتیریشیچه، سیلاو ساختهکارلیکلرینی توپلب و باشقه ولایتلرنینگ اعتراضچیلری بیلن زنبق تورت یولیده اعتراضیگه دوام بیرهدی.
شونینگدیک، باشقه بیرقطار اعتراضچیلرنینگ ایتیشیچه، دستلبکی رویخط گه موفق بولگنلر جملهسیدن ایدیلر، بیراق نهایی رویخط ده پولدار و زورهوان کیشیلر اولرنینگ جایلرینی آلگنلر.
عینحالده، جمهورلیک ریاستی سوزلاوچیسی نینگ اورین باسری شاهحسین مرتضوی نینگ خاص محکمه ایجاد ایتیلیشی خصوصیده ایتیشیچه، اعتراضچی نامزدلر اوز شکایتلرینی عدلی و قضایی نهادلرگه ارایه قیله آلهدیلر.
بوندن آلدین هم قطار اعتراضچی نامزدلر ناراضلیک نمایش یولگه قویب و قتناو یوللرنی باغلش بیلن آق آوازلرنی قاره آوازلردن اجرهتیلیشینی سورهگن ایدیلر، بیراق اوشبو اعتراضچیلرنینگ ایتیشیچه، حکومت حاضرگهقدر اولرنینگ ایستکلریگه دقت قیلمهگن.
