افغانستان جمهور رییسی محمد اشرف غنی دنیا اقلیمی اوزگریشیگه بغیشلنگن خلق ارا ییغینده قتنهشیش اوچون فرانسه پایتختی پاریسگه سفر قیلدی. مذکور ییغینده دنیا نینگ اکثریت مملکتلری باشلیغلری اشتراک ایتگنلر.
پاریس خلق ارا ییغینی حاشیهسیده دنیا دولتلری اوز ارا اوچرهشیب ایریم خلق ارا مسالهلر اوستیده بحث ایتگنلر. جمهور رییس محمد اشرف غنی هم مذکور اوچرهشوو ده قوشنی مملکت پاکستان باش وزیری نواز شریف بیلن اوچرهشگن. هلی گچه ایکی تامان ارا ایتیب ایشیتیلگن مسالهلر فاش ایتیلمهگن بولسه – ده، اشرف غنی و نوازشریفنی قندهی موضوعلر اوستیده سوزلشگنلیکلرینی تخمین قیلیش قیین ایمس، البته.
معلوم که طالبلرنینگ سابق رهبری ملا محمد عمر اولیمی فاش ایتیلیشی بیلن رسمی کابل بیلن طالبلر نمایندهلری ارا باشلنگن تینچلیک مذاکرهلری توختب قالگن ایدی. شونینگدیک بوندن تورت – بیش آی آلدین پایتخت کابلده یوز بیرگن مدهش هجوملر همده افغانستان نینگ شمال ولایتلریگه طالبلر نینگ حملهلری کوچهیگنی اینیقسه قندوز ولایتی مرکزینی جنگریلر اشغالیگه اوتیشی افغانستان دولتینی پاکستانگه بولگن ایشانچینی جدی سواللر بیلن روپهره قیلدی. کابل بلند مرتبهلی عملدارلری رسمی اسلامآبادنی افغانستانده یوز بیرهدیگن ترور هجوملریگه دخلدار ایکنلیککه متهم قیله باشلهدیلر. اوشبو واقعه – حادثهلر رسمی اسلامآباد و کابل مناسبتلری نینگ یامانلشیشیگه آلیب کیلدی.
کابل رسمیلری طالبلر بیلن اوتکزیلهجک مذاکرهلر نتیجهسیده افغانستانده تینچلیکنی تامینلش اوچون فقط پاکستانگه سوینمسلیکلری بارهسیده هم گپیرگن ایدیلر. یقینده ایریم طرفلر جملهدن امریکا و چین افغانستان و پاکستان مناسبتلریده وجودگه کیلگن ساووقلیکنی برطرف ایتیش اوچون تشبث کورستگن ایدیلر. چین نینگ افغانستان و پاکستان بوییچه مخصوص نمایندهسی اسلامآباد و کابلگه سفر قیلیب تامانلرنی تینچلیک مذاکرهلرینی قیته باشلش اوچون ترغیب ایتگن ایدی.
شونینگدیک پاکستان حربی کوچلری قوشمه مرکزی باشلیغی جنرال راحیلشریف نینگ بیش کونلیک امریکا سفری دوامیده هم افغانستان مسالهسی اوستیده بحث ایتیلگن. و واشنگتن رسمیلری راحیلشریفنی افغانستانده برقرارلیک اورنهتیش اوچون تینچلیک مذاکرهلرینی قیته باشلش اوچون یقیندن همکارلیک ایتیشی سورهلگن.
کونی کیچه افغانستان ملی خوفسیزلیک کینگشی مصلحتچیسی محمدحنیف اتمر هم ایریم دولتلر تامانیدن رسمی کابلنی پاکستان بیلن اوز مناسبتلرینی تیکلش اوچون باسیملرگه روپهره ایکنیگه اشاره قیلگن ایدی. جمهور رییس محمداشرف غنی نینگ پاریس سفریدن آلدین پاکستان نینگ خیبر پشتونخواه ولایتینینگ بعضی بیر پشتون سیاسی سیمالری کابلگه سفر قیلیب افغانستان رهبرینی پاریسده پاکستان باش وزیر نواز شریف بیلن ملاقات ایتیشلیککه ترغیب ایتگن ایدیلر.
افغانستان و پاکستان مناسبتلریده بیر نیچه آیلیک اوزیلیشدن سونگ ایکی مملکت بلند مرتبهلی رسمیلری نینگ پاریس اوچرهشووی رسمی اسلامآباد و کابل مناسبتلرینی قیته تیکلش یونهلیشیدهگی بیرینچی عملی قدم حسابلنهدی. کونی کیچه پاکستان رسمیلری جملهدن جنرال راحیلشریفنی افغانستانگه کیلیشی بارهسیده هم میش میشلر ترقلگن ایدی.
موجود وضعیتده ایکی قوشنی دولت افغانستان و پاکستاننی بیر بیری بیلن یقین علاقهده بولیشدن بولک چارهسی یوق. نیگه دیگنده، افغانستان و پاکستان منطقه و دنیا اوچون جدی تهدید حسابلنگن ترورچیلرنینگ فعالیت مرکزیگه ایلنگن. دنیا دولتلری هم هر بیر زمانگه نسبتن ترورچیلر تامانیدن کوپراق تهدید ایتیلماقده. فرانسه پایتختی پاریس شهریده عملگه آشیریلگن دهشتلی ترور هجوملری دنیانی ینه بیر بار ترورچیلیکنی دنیا اوچون نه قدر تهدید ایکنینی اثباتلب بیردی.
ایندی لیکده دنیا دولتلرینی ترورچیلیککه قرشی تاثیرچن کورهش آلیب باریش اوچون قوپارووچیلر فعالیتی نینگ مهم اوچاغلریدن سنلگن مملکتلر جملهدن افغانستان و پاکستانگه دقت اعتبار قرهتیشدن بولک چاره کورمهی دیلر. پاکستان دولتینی دنیانینگ ییریک کوچلری تامانیدن جدی باسیملرگه روپهره ایکنی ایتیلهدی. افغانستان رسمیلرینی موجود وضعیتدن فایدهلنیب پاکستاننی ترورچیلیککه قرشی کورهشده صداقت و صمیمیت بیلن همکارلیک قیلیشلیککه مجبور ایتیشی درکار.
طالبلرنینگ ادارهسی پاکستان قولیده ایکنی هیچ کیمگه سِر ایمس. رسمی کابل و اسلامآباد ارا مناسبتلرنی قیته تیکلش اوچون طالبلر نمایندهلری بیلن افغانستان دولتی ارا رسمی مذاکرهلرنی باشلش خصوصی سیده پاکستاننی جدی یاردم کورستیشی لازم.
دنیانینگ ییریک کوچلرینی افغانستانده تینچ مذاکرهلری ایجابی نتیجهلر آلیب کیلیشی اوچون رسمی اسلامآباد دن اعتبارلی کفالت آلیشلریگه احتیاج سیزیلهدی، عکس حالده پاکستاننی مذاکرهلرنی ینه بیر بار اوز منفعتلری یونهلیشیده مهم بیر اویینگه ایلنتیریشی ممکن.
افغانستان خلقی و حربی کوچلری اوتگن بیر ییل دوامیده جنگری طالبلر تامانیدن شدتلی هجوملرگه روپهره بولدیلر. 2015 ییلنی طالبان تیزیمی قولهتیلیشیدن سونگ اینگ قانلی ییل بولگنی ایتیلهدی. پاکستاننی اوز شرطلرینی قبول قیلدیریش اوچون افغانستان بویلب جنگ جدللرنی دوام ایتدیریشگه مایل کورینهدی. قیش موسمی ییتیب کیلیشی بیلن مملکت بویلب جنگریلر هجوملری آزهییشی ممکن. اما بهار موسمیده طالباننی ینه شدتلی راق هجوملر باشلشی احتمالی موجود.
افغانستان حربی کوچلرینی قیش موسمیده بهارده باشلنهدیگن هجوملر اوچون جدی تیارگرلیکلر کوریشی زمان نینگ اساسی طلبلریدن حسابلنهدی.
خلاصه قیلیب ایتگنده جمهور رییس اشرف غنینینگ پاریس سفری افغانستان دیپلماسیسی اوچون قولی بیر فرصت سنلهدی. افغانستان رهبرلری انه شو فرصتلردن اوستهلیک بیلن فایدهلنیشلری ضرور.
