افغاسنتان عالی تینچلیک کینگشی‌نینگ مسوول‌لری، گلبدالدین حکمتیار رهبرلیگی‌ده‌گی اسلامی حزب بیلن بو کینگش اورته‌سی‌ده مذاکره‌لر دوامی بار دیگن‌لر.
عالی تینچلیک کینگشی تشقی علاقه‌لر کمیته مصلحتچی‌سی محمداسماعیل قاسمیارنینگ سلام‌وطندارگه ایتیشیچه، آلدین اوتکزیلگن مذاکره‌لرده کیلیشیگن مسوده متنی آچیق‌له‌نیشی اوچون اوستی‌ده بحث جریانی بار.
شونینگ‌دیک جناب قاسیمار گلبدالدین حکمتیار ییتکچیلیگی‌ده‌گی اسلامی حزب بیلن عالی تینچلیک کینگشی اورته‌سی‌ده یقین‌ده بیتیم‌گه قول قوییلیشی‌نی معلوم قیلگن.
عین حالده، اسلامی حزب اجراییه کینگشی‌نینگ باشلیغی گل‌محمد گلزی تینچلیک مذاکره‌سی‌نینگ مسوده‌سی‌نینگ ایشی انچه ایلگری کیتگن دیگن.
او، اساسی مساله حکمتیار قچان و قنده‌ی کابل‌گه کیلیش موضوع اوستی‌ده بحث و مذاکره‌لر دامی بارلیگی‌نی تیل‌گه آلگن.
بو اوچینچی مرته اسلامی حزب هیاتی مذاکره‌گه اولتیریش اوچون کابل کیله‌دی. اوشبو هیات‌لر عالی تینچلیک کینگشی‌نینگ اعضالری بیلن ایکینچی مرته اوتکزگن ییغینی‌ده حکومت بیلن اسلامی حزب اورته‌سی‌ده بیتیم‌گه قول قوییلگن ایدی؛ اما، بیتیم‌گه قول قوییلیشی اوچون گلبدالدین حکمیارگه آلیب باریلگن‌ده او اوشبو شرطنامه‌گه بعضی اوزگریش‌لر کیریتیلیشی‌نی طلب قیلگن.
اسلامی حزب رهبری‌نینگ بو تدبری حکومت بیلن حزب‌نینگ اورته‌سی‌گه بعضی سُست‌لیک‌لر آلیب کیلدی؛ بیراق کورینیشیچه ایکّی تامان مساله‌گه پایان بیریش اوچون ینه سعی وحرکت باشله‌گن‌لر.
