د کابل طبي پوهنتون رییس شيرين اغا ظریف وايي، چې د دغه پوهنتون ټولو استادانو د اعتراض په ډول د پوهنتون دروازې د محصلينو پرمخ تړلې دي.
دوی اعتراض کړی، چې نه باید د کابل طبي پوهنتون د " زړه روغتون" پخوانی مالکيت د عامې روغتيا وزارت پورې اړوند شي.
شيرين اغا ظریف زیاتوي، چې ولسمشر په شفاهي ډول موافقه کړې، چې باید د کابل طبي پوهنتون د دغه روغتون پخوانی مالکیت د عامې روغتیا وزارت په نوم شي.
هغه وايي، چې د استادانو دغه اعتراض یو مدني حرکت دی.
د یاد پوهنتون رییس زیاتوي، سره له دې چې د لوړو زده کړو وزارت وزیره فریده مومند له استادانو غوښتنه وکړه، څو خپل دغه درسي تحصن ته د پای ټکی کيږدي، خو د نوموړي په وينا استادانو د تحصن د ادامې پريکړه کړې.
له بل لوري ډاکټر امین علي زی د کابل طبي پوهنتون له یو تن استادانو وايي، چې د عامې روغتيا وزارت په نوم نوی نومول شوی قلبي یاد د زړه روغتون، چې له دې وړاندې یو بل چاته ورکړل شوی وو.
هغه د دغه شخص نوم نه دی اخیستی.
علی زی وايي، تر څو چې د قلبي روغتون ملکیت او تجهیزات د کابل طبي پوهنتون پورې اړوند نه شي، نو خپل تحصن ته به ادامه ورکړي.
له بل لوري د یاد پوهنتون ځينې محصلین وايي، چې دوی د خپل تحصيلي کال په وروستيو ازموينو کې دي او دغه تحصن به د دوی د ازموينو د ځنډ لامل شي.
دوی له دولت څخه غوښتنه کوي، چې ژر تر ژره دې ستونزې ته د پای ټکی کيږدي.
له بل لوري بیا د لوړو زده کړو وزارت وايي، چې د دغې ستونزې د حل په موخه يې یو پلاوی ټاکلی دی.
یاده دې وي، چې د قلبي روغتون مالکیت د پخواني ولسمشر کرزي د حکومت پر مهال د کابل طبي پوهنتون پورې اړوند شوی و.
