د افغانستان د ولسمشرۍ ماڼۍ وايي، چې افغان ولسمشر محمد اشرف غني د خپلو معالجو ډاکټرانو له سلا مشورو وروسته له هېواد بهر د درمنلې له پاره تللی دی.
د ولسمشر د ویاند مرستيال سېد ظفر هاشمي سلام وطندار ته په خبرو کې وویل، چې ډېر ژر به ولسمشر غني هېواد ته راستون شي.
هاشمي وايې، چې غني روغتیايي حالت د ډاډ وړ دی او یواځې دې په تمه ده، د معالجو ډاکترانو له لوري ورته د تللو اجازه ورکړل شي.
خو له بل لوري یو شمېر د سیاسي چارو شنونکي په دې باور دي، چې په هېواد کې سیاسي بدلونونو بهیر زیات شوی او هره شېبه د جدي پرېکړې اړتیا ليدل کيږي.
په دې اړه د ولسي جرګې د نړیوالو اړیکو رییس دکتور عبدالقیوم سجادي وايي، چې د هېواد په دې اساسو شرایطو کې د ولسمشر موجودیت خورا اړینه ده.
اخوا بیا د سياسي او حقوقي چارو شنونکی لطیف نظري سلام وطندار ته وویل، چې د هېواد په اوسنیو شرایطو کې د ولسمشر نه موجویت د هېواد په سیاسي او امنیتي حالت اغیزمنولی شي.
دی وايي، چې د ولسمشر تشه د حکومت په سیاسي، امنیتي جوړښت کې بې نظمي رامنځته کوي.
له دې وړاندې د ولسمشر د صحت په باب په ټولنيز رسنيو کې بېلابېلو اوازې وې، چې دغه اوازې ان د عامو وګړو کې هم خوله په خوله کېدې.
خو د ولسمشرۍ ماڼۍ په رسمي پاڼه کې د المان په یو روغتون کې د ولسمشر د عکس له خپرېدو او د ولسمشر د ویاند له خبرو داسې ښکاري، چې د محمد اشرف غني احمدزي روغتيا د ډاډ وړ دی.
ولسمشر د افغانستان په سیاسي جوړښت کې د درېیو ځواکونو په راس کې قرار لري، چې د افغانستان د عالی سرقومنداني مقام يې په اوسنيو جنګي شرایطو کې خورا اړين برېښي.
د ده نه موجودیت کېدی شي، چې د هېواد د ځينو سيمو په امنيت کې هم منفي اغیز وکړي.
