اوتگن هفته «پنج‌شنبه» کون ایکی یاش ییگیت تامانیدن دستلب جنسی زورلنیب و اوندن سونگ، پیچاقلب اولدیریلگن 8 یاشر اخترمحمد آتلی باله‌نینگ عایله‌سی، حکومتدن اوغلی‌نینگ قاتل‌لری دارگه تارتیلیشی‌نی سوره‌گن.
قتل ایتیلگن باله‌نینگ آته‌سی مولوی احمد و نورآباد قیشلاغی‌نی ملاامامی مولوی حبیب‌الله‌نینگ ایتیشیچه، مذکور قیشلاق اهالیسی اخترمحمدنینگ قاتل‌لری دارگه آسیلیشی‌نی سوره‌یدیلر. اولرنینگ آگاه‌لنتیریشیچه، حکومت بو قضیه توغریسیده بی‌فرق یانده‌شگن صورتده، اهالی تینچ تورمه‌یدی.
اوشبو باله‌نینگ یقین‌لری و قرینداشلری‌نینگ ایتیشیچه، شونده‌ی قضیه‌لر توغریسیده حکومت‌نینگ دقت سیزلیگی باعث، اهالی حکومت‌نینگ صداقتی و جدیتی‌گه ایشانمه‌یدی و شونینگ‌دیک، بو مرته هم حکومت تامانیدن بی‌فرق یانده‌شیلگنده اهالی هیچ قچان حکومت‌گه ایشانمه‌یدی.
بیراق، هرات حاکمی سوزلاوچیسی جیلانی فرهادنینگ سلام‌وطندارگه ایتیشیچه، اوشبو قضیه توغریسیده ایکی کیشی قولگه آلینگن و ایکاوی قانون اساسیده، جزالنه‌دی.
شونینگ‌دیک، هرات پولیسی‌نینگ ایتیشیچه، قولگه آلینگن‌لر جرملرینی تَن آلگن و اولرنینگ دوسیه‌لری عدلی و قضایی اداره‌لریگه تاپشیریلگن.
