کابل خیرخانه منطقهسینینگ بیر قنچه یشاوچیلری، اوتگن ایکّی آی ایچیده بو منطقهده 11 مورد اولدیریش واقعهسی یوز بیرگن لیگینی ایتگنلر. اولرنینگ سوزلریگه قرهگنده، کابل شهری یشاوچیلرینینگ خوفسیزلیگی تامین ایتیلیشی اوچون حکومت اونچهلیک اعتبا قرهتمدی.
اینگ ینگی مورد ده ندیم ناملی یاش – ییگیت چاقولهنیب اولدیریلگن. 17 یاشلی ندیم دوشنبه دن سهشنبهگه اوترکیچهسی خفتن نمازینی اوقیش اوچون مسجد تامان کیتهدیگن بیر چاغده اولدیریلگن.
اولدیریلگن شخصنینگ آتهسی محمدنعیمنینگ جنازه مراسمیده سلاموطندارگه ایتیشیچه، اوغلینی اولدیرگن کیشی نیچه مورد اوندن بعضی بیر نا قانونی ایستکلری بولگن و انه شو باعث هم ندیمنی نیچه بار تهدید ایتگن.
ندیمنینگ آتهسی، چاقو اوغلینینگ یورهگیگه کوچ بیلن اوریلگنی سبب شفاخانهگه آلیب باریلگندن سونگ اوغلی عالمدن اوتگن لیگینی تیلگه آلگن.
نعیمگه کوره، اوغلینی قتل ایتگن کیشی حادثه ییریدن قاچیشگه موفق بولگن.
ندیمنینگ عایلهسی، حادثهنینگ عاملی پولیس تامانیدن قولگه آلینیب عدلی و قضایی ادارهلرگه تاپشیریلمهگن حالده، اوزلری ایش کوریشلری حقیده آگاهلنتیرگنلر.
کابل جنایی جرملرگه قرشی کورهش تحقییقات ادارهسینینگ باشلیغی فریدون عبیدی، واقعه عامل تانیلگن دیدی. جناب عبیدی، مذکور شخص قولگه آلینیشی اوچون جدی چاره تدبیر کوریلگن لیگینی ایتگن.
کابل جنایی جرملرگه قرشی کورهش تحقیقات بولیمینینگ باشلیغی، 11 مورد قتلدن کابل پولیسی 2 کیشینی حبسگه آلیب عدلی و قضایی ادارهلرگه تانیشتیرگن لیگینی بیلدیرگن.
