ملی بیرلیک حکومتینینگ اجراییه باشلیغی عبدالله عبدالله، «سوو یشش اوچون دییلگن» خلق ارا نمایشگه اشتراک ایتیش اوچون ایکی کونلیک رسمی سفرده تاجکستان باریب، بیرینچی کونیده مذکور مملکت باش وزیری و جمهور رییسی بیلن اوچرهشیب سوزگه چیقدی.
افغانستان اجراییه ریاست دفتری تامانیدن ترقهتیلگن خبرنامه گه کوره، بو اوچره شوولرده ایکی تامان سیاست، امنیت، اقتصاد، اجتماع و معارف توغری سیده ایکی تامانلمه همکارلیک خصوصیده سوزلشگنلر.
تاجکستان جمهور رییسی اماعلی رحمان، افغانستان ملی بیرلیک حکومتینینگ سیاستیدن حمایت بیلدیریب ایتیشیچه، تاجکستان منطقه و دنیا مملکتلری اینیقسه افغانستان بیلن علاقه سینی کینگیتیریش اوچون تیاردیر. جناب رحماننینگ کوپهیتیریشیچه، حاضرگه قدر 70 دن آشه راق شرطنامه گه ایکی مملکت اورته سیده قول قوییلگن.
افغانستان ملی بیرلیک حکومتی اجراییه باشلیغی، تاجکستانگه قیلگن سفریدن مقصد افغانستان و تاجکستان علاقه سینی کینگیتیریش دیب ایتیشیچه، ایکی مملکت ارا اساسی علاقه موجود و بیز بو علاقه لرنی کینگیتیریش اوچون سعی و حرکت قیلهمیز.
اجراییه باشلیغیگه کوره، بو سفرده امنیت مسالهسی، افغانستان شمالی دهگی ناتینچلیکلر، مخدر ماده سیگه قرشی کورهشیش اجراییه باشلیغی و تاجکستان باش وزیری و جمهور رییسینینگ اورته سیده بحثگه آلینگن موضوعلردن بولگن.
جناب عبدالله، افغانستانده اوروش کینگهییشی و امنیتی تهدیدلرنی اساسی قیینچیلیکلردن دیب ایتیشیچه، کوکلم موسومی کیلیشی بیلن افغانستانده ناتینچلیکلر کون ساین کوپه یب کیتدی و مذکور قیینچیلیک مملکت شمالیده اوتیب باردی. بیراق اونینگ ایتیشیچه، مملکت دهگی امنیتی وضعیت دولت باشقرویگه بولگن و طالبلر ایریم منطقهلرنی قمراوگه آلیشگه موفق بولمهگن.
شونینگدیک تاجکستان جمهور رییسی، افغانستان شمالی دهگی ناتینچلیکلرنی مملکتی اوچون خواطرلی بیلیب و بیرگهلیک تهدیدلر، تروریسیمگه قرشی کورهشیش و امنیتی همکارلیکلرگه تاکید قیلگن. اجراییه ریاستینینگ خبرنامهسی جناب رحماندن نقل قیلیب یازیشیچه، « افغانستان امنیتی، تاجکستان امنیتی دیر و مملکتی افغانستانده تینچلیک تامین لنیشی، تروریسم، بنگیوارماده و اویوشتیریلهدیگن جنایتلرگه قرشی کورهشیش اوچون یاردم بیرهدی».
منطقهیی علاقه
اجراییه ریاست باشلیغی، افغانستان سیاستینینگ قرمه قرشیلیگی منطقهده بویلب قنقه لیگیگه اشاره قیلیب ایتیشیچه، افغانستان منطقه مملکتلری و پاکستان بیلن علاقهسی یخشی لنیشی توغری سیده سعی و حرکت قیلهدی و باشقه مملکتلرنی تروریسمدن حمایت قیلمس باره سیده چقیرهدی.
شونینگدیک جناب عبداللهنینگ ایتیشیچه، افغانستان منطقهیی همکارلیکلرگه اهمیت بیرهدی، منطقه بوییچه تیمیر یول قوریلیشی و برق اوتکزیلیشی اساسی ایشلردن بولگنلیگینی اورغولیدی.
عبدالله تینچلیک مذاکرهسی توغری سیده اشاره قیلیب، بو توغریده سعی و حرکتلر دوام ایتماقده، بیراق حاضرگه قدر بو سعی و حرکتلر نتیجه بیرمهگن و تینچلیک سوزلشوولر اوچون کوزگه کوینرلی ایشلر عملگه آشیریلمهگن.
دوامیده تاجکستان جمهور رییسینینگ ایتیشیچه، اولکه سی منطقهیی رابطهلر یوکسلیشی، زیربنا قوریشلر، اینیقسه افغانستان و تاجکستان قتناو یوللرینی ایجاد ایتیلیشیگه سرمایه یاتقیزهدی.
شونینگدیک، جناب رحماننینگ ایتیشیچه، تاجکستان، افغانستانگه برق یاردم بیریشینی دوام بیرهدی و بو توغریده ایکی مملکت برنامهلری یکونلنگنیدن کیین، افغانستاننینگ برقی احتیاجلری حل بولهدی. او، افغانستان گازیدن تاجکستانگه انتقال بیریلیش باره سیده امید قیلهدی.
امامعلی رحماننینگ اورغولهشیچه، منطقهده تینچلیک تامینلهنیشی خصوصیده تیزلیکده «کاسا بیرمینگ» لایحهسی عملگه آشیریلیشی لازم و تیمیر یول لایحهسی افغانستان و منطقه مملکتلری اورته سیده سونگی نتیجهگه ییتیشیب عملگه آشیریلیشی کیرهک.
جناب رحماننینگ کوپهیتریشیچه، افغانستان متخصصلرینی اورگهتیش خصوصیده یاردم بیرهدی و حاضرگه قدر افغانستان اوچون 250 تحصیلی بورس تیارلهگن و کیلهجک ییللرده بو لایحه کوپهییشی ممکن.
شونینگدیک تاجکستان باش وزیری قاهر رسولزاده اجراییه باشلیغی بیلن اوچرهشگن بیرچاغده، مملکتی منطقه همکارلیکلری و افغانستان بیلن علاقهسی کینگهییشی توغری سیده ایشانهدی.
جناب رسولزادهنینگ کوپهیتیریشیچه، تاجکستان ترانزیتی یولنی افغانستان و پاکستان مملکتلری اورته سیده فعال قیلیش اوچون علاقه کورستهدی. اونگه کوره، بو منطقهده سوداگرلیک علاقهلری کینگهییشی، تینچلیک تامینلهنیشیگه سبب بولهدی.
ایکی تامانلمه همکارلیکلر کیلیشووی
اجراییه باشلیغی و تاجکستان باش وزیرینینگ اولتیریشی اداغیده، افغانستان و تاجکستان تشقی ایشلر وزیرلری صلاح الدین ربانی و سراجالدین اصلوف، ایکی مملکت تشقی ایشلر وزیرلیکلری اورته سیده همکارلیک کیلیشووگه قول قویگن.
داکتر عبداللهنینگ ایتیشیچه، ایکی مملکت رسمیلری بو قول قوییلگن کیلیشووگه قوشیمچه باشقه کیلیشوولرگه هم قول قوییشلری ممکن.
شونینگدیک اجراییه باشلیغینینگ ایتیشیچه، انه شوندهی مخابرات و تکنالوژی توغری سیده ایکی مملکت اورته سیده تیزلیکده همکارلیک کیلیشووگه قول قوییلهدی و بو ایکی مملکت اورته سیده ایش زمینه سینی یرهتهدیلر.
شونینگدیک تاجکستان باش وزیری، ایکی مملکت تشقی ایشلر وزیرلری اورته سیده قول قوییلگن همکارلیک کیلیشوولرنی افغانستان و تاجکستان علاقهسی کینگهییشی خصوصیده ایجابی تأثیرلی دیب بیلهدی.
حکومتلر ارا کمیته ایجاد ایتیلیشی
تاجکستان جمهور رییسی بیلن عبداللهنینگ اوچره شوویده، جناب رحمان حکومتلر ارا بیر بیرگهلیک کمیته ایجاد ایتیلیشی توغری سیده تاکیدلب، ایکی تامان بولایحه اوستیگه ایشلب، تیزلیکده عملگه آشیریلیشینی تیلگه آلدی.
شونینگدیک افغانستان اجراییه باشلیغینینگ ایتیشیچه، مذکور کمیته تیزلیکده تشکیل ایتیلیب، ایکی مملکت بیرگه لیک لایحه ستیگه ایشلهیدی.
ایتیلیشیچه جناب عبدالله اوشبو سفرده «سوو یشش اوچون دییلگن» خلق ارا نمایشگه اشتراک ایتهدی. بو نمایش جون آیینینگ 9 دن 11 گچه دوشنبه شهریده اوتکزیلهدی، و بو نمایش گه کمیده 100 مملکت و 30 خلق ارا تشکیلات نماینده سی اشتراک ایتهدی.
شونینگدیک، مذکور نمایش ده بیرلشگن ملتلر تشکیلاتینینگ باش کاتبی بانکی مون هم اشتراک ایتیشی کوتیلهدی. مذکور نمایشدن مقصد «سوو یشش اوچون دییلگن» (2005- دن 2015- ییل گچه) 10 ییل برنامهلرینی تیکشیریش بولگن. مذکور برنامه 10 ییل آلدین تاجکستان دولتی نینگ تکلیفی و بیرلشگن ملتلر تشکیلاتی تامانیدن اعلام بولنگن ایدی.
