اوتگن کون سهشنبه حمل آیی نینگ 11- سی، 23 ماده لیک «آغیر خرجتلرنی توسیش» قانونی اوزاق بحث لشوودن کیین کوپچیلیک آواز بیلن افغانستان سنا مجلسینینگ قانون توزه تووچی، عدلی و قضایی کمیسیونی آرقهلی تصدیق لندی.
اوشبو قانونگه موافق، 500 دن آرتیق مهمان اشتراک قیله دیگن توی مراسملریگه هوتلده اوتکزیش اوچون حجت بیریلمیدی. شونینگدیک مذکور قانونده قَلین همده جهزیه بیریش هم منع قیلینگن. لیکن، افغانستانلیک سناتورلرنینگ بعضیلریگه کوره، توی مراسمیده اشتراک قیله دیگن مهمانلرنینگ سانی انیق بولمس لیگی کیرهک.
سنا مجلسینینگ اعضاسی فیصل سمیع نینگ سوزلریگه کوره، توی مراسملریگه چقیریلهجک مهمانلرنینگ سانی چیکلنمس لیگی لازم، یخشیسی بو قانون فقط قشاق و کمبغل خانهدانلرگه چیکلهنیشی توغری. اونینگ بیلدیریشیچه، مملکت ایچکریسیده اوشبو قانون عملده جاری ایتیلیشی بیلن بیرگه بای و بهدولت خانهدانلر تشقی مملکتلرگه کیتیشی ممکن، بو ایسه افغانستاندن سرمایهلرنی قاچیریشگه باعث بولهدی.
سنا مجلسینینگ ایشلب چیققن قانونیگه موافق، خینه کیچهسی، شیرینی خورلیک، اونشتیریش، کیستیرمه توی، آلتیکیچه، خویش خورلیک، بوغجمه ییغیش، پای وازلیک، ییللیک، حجدن قیتیش بالهگه نام قوییش کبی مراسملر هم هوتللرده نشانلهنیشی توسیلگن. عین حالده، مذکور قانونگه موافق قیزنینگ عایلهسی نامزدلیک جریانیده هییت لیک، ینگی ییللیک، و باشقه مناسبتلر بیلن کیاو عایلهسیدن هیچ قندهی پول سورهش گه حقلی بولمی، شو کبی قَلین هم کیلین تامانیدن تصدیق لنهدی.
آغیر خرجتنی توسیش قانونیده ایرککلر آرقهلی عیاللر لباسی کییلیشی و همده اولرنینگ بیزهلیشلری هم منع ایتیلگن. بو قبل عرف و عادتلر بی مورد بولگن لیگینی ایتگن مذکور قانوننی تصدیق لهگن سنا مجلسینینگ اعضالریگه کوره، بوندهی رسم و رواج لر اسلام دینی اصولیگه قرشی دیر.
سنا همده نمایندهلر مجلسی اورتهسیده مذکور قانون اوچون قرهمه قرشیلیک پیدا بولگن حالده، ایکّی مجلسدن تشکیل ایتیلهجک کمیسیون قرشی موردلر اوستیده بحث قیلیشلری کوتیلهدی. بو قانوننینگ اختلافی موردلری حل ایتیلگندن کیین تصدیق لهنیشی اوچون جمهور رییسگه جونَتیلهدی.
افغانستانده توی مراسملریده صرفلنهجک آغیر خرجتلر قطار یاشلرنی اویلنَهآلمس لیکلریگه سبب بولیب، اولرنی توی خرجتینی تاپیش اوچون قوشنی مملکت لرده بدرغه قیلیشگه مجبور ایتهدی. توی مراسملری اوچون ایشلب چیقیلگن مذکور قانون قنچهلیک عملده تطبیق ایتیلیشینی زمان بیللی قیلهدی.
