افغانستان کې د ناټو ملکي استازي سټيفانو پونټیکورو په يوه ټوېټ کې کابل ښار کې پر ښوونيز مرکز ځانمرګی بريد غندلی او ويلي يې دي چې د بېګناه ځوانانو وژل هېڅ وخت د منلو نه دي.
يوناما هم د يوې اعلاميې په خپرولو سره کابل کې د تېرې ورځې ځانمرګی بريد چې پر يوه ښوونيز مرکز وشو او ډېری زدهکوونکي په کې ووژل شول « جنګي جنايت» بللی او ويلي يې دي چې د دې پېښې عاملان بايد محاکمه شي.
یوناما دغه راز په افغانستان کې د اوسني تاوتریخوالي په اړه اندېښنه ښودلې او ويلي يې دي چې دلته باید د تاوتریخوالي د کمولو او جګړو د ختمولو لپاره هڅې لا ډېرې شي او مذاکراتي پلاوي بايد يوه سياسي جوړجاړي ته ورسېږي.
د پاکستان د بهرنيو چارو وزارت هم کابل کې کوثر دانش ښوونيز مرکز باندې بريد « غير انساني او ترهګريز» بللی دی.
کابل کې د ايران سفارت هم په يوه ټوېټ کې پرونی بريد غندلی دی.
تېره ورځ مازديګر شاوخوا ۴ بجې او ۳۰ دقیقې د کابل ښار ۱۳مې حوزې اړوند د دشت برچي پل خشک سيمه کې يوه ښوونيز مرکز ته نږدې ځانمرګي بريدګر ځانته چاودنه ورکړه.
د کورنيو چارو وزارت د معلوماتو له مخې په دې بريد کې ۱۷ کسان ووژل شول او ۵۷ نور ټپيان شول.
د دې بريد مسووليت داعش ډلې پر غاړه واخيسته.
ولسمشرۍ ماڼۍ د ياد بريد د غندلو ترڅنګ وويل چې دا چاودنه د طالبانو کار دی؛ خو د طالبانو يوه وياند رسنيو ته وويل چې بريد دوی نه دی کړی.
د ملي مصالحې عالي شورا رييس عبدالله عبدالله هم پرونی ځانمرګی بريد غندلی او دا کار يې بشر ضد او د اسلامي ارزښتونو پر خلاف وباله.
نوموړي زیاته کړه چې ترهګرو د ياد بريد پر ترسره کولو سره چې قربانيان يې ماشومان دي وښوده چې اصولو ته هېڅ ژمن نه دي.
