په بلخ/ام‌البلاد کې حضرت علي ته منسوبه روضه، د مولانا جلال‌الدین محمد بلخي د پلار بهاوالدین خانقاه، نهه ګنبد لرونکی جومات، د جهان نما ماڼۍ او د هوټلونو او عصري مېلمستونونو او د پراخو شنو دښتو موجودیت د دغه ولایت د ښکلاوو یوه برخه ده چې د نړیوالو ګرځندویانو او سیلانیانو پام یې ځان ته اړولی دی.

خو په وروستیو کلونو کې د بلخ په یوشمېر سیمو کې د وسله‌والو پراخ موجودیت د دې لامل شوی چې دغه ولایت ته د کورنیو او بهرنیو سیلانیانو ورتګ کم شي.

بلخ کې نهه‌ګنبد لرونکی جومات

د بلخ د مرکز مزار شریف ښار یوشمېر اوسېدونکي د اندېښنې په څرګندولو سره وایي چې ناامنۍ د دې لامل شوي چې دغه ولایت ته د افغانستان د نورو سیمو د سیلانیانو ترڅنګ، بهرني ګرځندویان هم له ورتګ څخه ډډه وکړي. د دوی په خبره، تر هغه چې په هېواد، په ځانګړې توګه بلخ کې امنیت ټينګ نه شي، هېڅ نړیوال سیلاني به افغانستان ته د راتلو زړه ښه نه کړي. دوی له دولت څخه غواړي چې د هېواد امنیت، په تېره هغه سیمې چې تاریخي او لرغوني اثار لري، وساتي.

په ورته وخت کې د بلخ د اطلاعاتو او فرهنګ ریاست مسوولان پر ګرځندويئ د اناامنیو منفي اغېز مني او وایي، که د دغه ولایت کې امنیت ټينګ شي، ګڼ‌شمېر سیلانیان به ورته د ورتلو زړه ښه کړي چې په دې سره به له یوې خوا د بلخ مېشتو وګړو د اقتصاد په وده کې رغنده رول ولوبوي او بله‌خوا به له دې لارې د دولت خزانې ته ښه عاید ورشي.

د دوی په وینا، په بلخ کې د ګرځندوی صنعت په نشت حساب دی او د سیلانیانو شمېر هم کم شوی دی. د دغه ولایت د اطلاعات او فرهنګ ریاست مسوولان ټينګار کوي چې ناامني دغه ولایت ته د ګرځندویانو د نه ورتګ یو ستر لامل دی.

د مولانا جلال‌الدین محمد بلخی د پلار بهاوالدین خانقاه

د بلخ د اطلاعاتو او فرهنګ رییس مطیع‌الرحمان کریمي وایي، دغې ادارې نږدې ۶۰ تاریخي ځایونه او له ۴۰ تر ۵۰ لرغونې سیمې تصویب او ثبت کړې دي.

په ورته وخت کې د بلخ د امنیې قومانداني مسوولان د سیلانیانو د ځان او مال خوندیتوب ته ژمنتیا ښيي او وایي، هڅه کوي چې دغه ولایت ته د ورغلو لویو لارو او ولسوالیو امنیت ټينګ کړي.

د کارپوهانو په باور، که هېواد کې د امنیت ټينګولو لپاره کوټلي ګامونه پورته نه شي او دولت هم سیلانیانو ته د ګرځندوی اسانتیاوې برابرې نه کړي، د وخت په تېرېدو سره به په بلخ کې د ګرځندوی صنعت له ورکې سره مخامخ شي.

پدې خبر پورې اړوند:

کلیدواژه‌ها: // // //

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام