د افغانستان د ازادو رسنیو د ملاتړ ټولنې یا نی د سلواغې په ۲۷مه، د پنجشنبې ورځ په یوه خبرپاڼه کې لیکلي چې په وروستۍ یوه میاشت کې د خبریالانو د نیول کېدو او ځورونې پېښو زیاتوالي د دوی اندېښنې را پورته کړې دي.
د سلاموطندار پښتو فېسبوکپاڼه وڅارئ
نی زیاته کړې چې دوی ته رسېدلي معلومات ښيي چې د کندهار امنیتي ځواکونو د دغه ولایت یو محلي خبریال محمدیار مجروح نیولی او له دوو ورځو راهیسې بندي دی.
په خبرپاڼه کې لیکل شوي: «له دوو کلونو په کمه موده کې دا څویم ځل دی چې امنیتي ځواکونه په کندهار کې خبریالان نیسي یا یې احضاروي. همدارنګه، امنیتي ادارو د تېرې یوې میاشتې پر مهال په کابل، ننګرهار، کندهار او غور کې هم خبریالان نیولي او احضار کړي دي.»
د افغانستان د ازادو رسنیو د ملاتړ ټولنې دغه راز ویلي چې د کورنیو چارو وزارت اړوند امنیتي ځواکونه دوه ورځې وړاندې کابل کې پر تمدن خصوصي ټلوېزیون یرغل کړی او د دې رسنۍ د مسوولانو په وینا، کارکوونکي او خبریالان یې ځورول شوي او موټر یې هم ترې بیولي دي.
نی ټینګار کړی چې د اسلامي امارت د ځواکونو له لوري ورته نیونې او ځورونې د منلو نه دي او «په هېڅ ډول نهشي توجیه کېدلی.»
خبرپاڼه کې زیاته شوې: «نی تمه لري چې مسوول چارواکي ژرترژره محلي خبریال محمدیار مجروح خوشې کړي او که کوم ادعا هم وي، د رسنیزو سرغړونو کمېسیون ته دې وسپاري. د یادونې ده چې د کورنیو چارو وزارت باید د تمدن ټلوېزیون په اړه هم وضاحت ورکړي، موټر یې بېرته ورته وسپاري او له مسوولانو یې هم بښنه وغواړي.»
اسلامي امارت تر اوسه د یاد خبریال د نیول کېدو او پر تمدن ټلوېزیون د یرغل په اړه څه نهدي ویلي.
